今個禮拜五同下個禮拜二，屬於國際賽期，世界各地國腳又要周圍飛。對於一啲大球會嚟講，陣中大部份球員都返晒國家隊備戰，剩番小貓三四隻喺度，都咪話唔愁；唔覺意有埋「FIFA病毒」，真係損兵折將。曼聯為咗避免問題出現，決定用私人飛機載球員返英國，其中香川真司就做咗VIP嘞。
領隊費格遜日前喺對雷丁場波賽後講，為咗隊員唔會因為國際賽舟車勞頓而影響表現，叫咗助教費蘭傾，用私人飛機載球員返大本營，並且喺今個國際賽期實行。今季先至加盟紅魔嘅香川真司，就成為幸運兒之一；佢今個禮拜五先會喺卡塔爾多哈代表日本友賽加拿大，然後下個禮拜二世盃外就作客約旦。
待遇媲美中田英壽
由中東飛返英格蘭都咪話唔花時間，為咗慳番時間同體力，等香川可以集中精神應付之後嘅聯賽，同英足盃大戰車路士；曼聯就出私人飛機載佢返大本營，花成差不多63,000鎊（約74萬港元）。呢個絕對係國寶級待遇，因為之前外流嘅日本球員，就只有中田英壽試過。除咗香川之外，另一最大得益者係「小豆」查維亞靴南迪斯，因為墨西哥下個禮拜二世盃外會主場對美國，中北美洲咁遠，唔搭私人飛機點頂得順？
講番香川，前日就係佢24歲生日，佢今年投身紅魔後，雖然唔係場場正選，但越嚟越受重用；無論場內定場外都係咁，好似上個禮拜就代表球會出席名錶贊助商嘅慈善活動。至於佢噚日已經喺多哈會合日本國家隊隊友，由於今次藍武士大軍名單中，冇咗受傷嘅本田圭佑同長友佑都兩位外流大佬，香川今次真係擔大旗，幫日本爭出線世盃。