咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
曼城今季被曼聯放甩15分，最大問題唔係後防，而係中前場多咗啲隱形人，搞到進攻大失水準。
今季踢完29場，曼城入51球失26球；比較上季，佢哋踢到第29輪嗰陣，曼城已經入到71球而失21球。雖然防守比上季同期失多5球，但進攻方面足足入少20球，所以曼城入球能力嚴重退步，絕對係跌watt嘅主因。
跟住就要睇吓邊個曼城前場球員跌watt，阿古路係上季曼城首席射手，34次上陣入23球，場均入0.68球；但佢喺今季成日受傷，影響埋狀態，到𠵱家只係踢咗23場入9球，場均入0.39球。喺傷患之下，阿古路做咗半個隱形人。
大衛施華係上季曼城嘅進攻泉源，入6球兼送出15次助攻，但今季已經踢咗大半季，佢都係得3個入球同7次助攻，睇嚟實追唔番上季嘅數字。如果話大衛施華唔見咗一半功力，咁拿斯尼就應該可以拎去堆填區。佢上季踢咗30場聯賽，入5球加9個助攻，但佢今季踢咗20場，退步到得1球同3個助攻，幾乎完全變咗隱形人。
睇埋其他球員，迪斯高、耶耶托尼同占士米拿嘅表現好穩定，同上季差唔多。巴洛迪利上季爆發、今季廢，仲走埋㖭；好在泰維斯上季失蹤、今季返嚟，彌補番巴神嘅位置。經過粗略嘅分析，阿古路同大衛施華跌咗半，加埋拿斯尼消失，導致曼城攻力大減。文：咖喱