咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
小弟中小學都就讀天主教學校，雖然自少受到薰陶，但卻沒有入教；𠵱家對天主教嘅印象，除咗中學時和藹可親嘅修士，同埋每年定時定候幫手賣賣物會獎券；選教宗嘅印象，亦只不過嚟自《達文西密碼》同《天使與魔鬼》兩套電影。
上周經過一番投票過程，終於由阿根廷籍嘅方濟接任；呢位新教宗被起底，原來佢係資深足球迷，阿甲嘅聖羅倫素係佢愛隊，佢亦都十分欣賞阿根廷球王美斯。方濟一上任，果然保佑到佢哋，聖羅倫素喺阿甲聯賽打少一人下，竟然靠對手擺烏龍，作客擊敗高隆。美斯周日喺西甲又入兩球，協助巴塞大勝華歷簡奴，方濟保持威力，阿根廷14年贏世界盃都唔出奇。
修咸頓嘅阿根廷籍領隊普捷天奴，賽前求方濟保佑，希望修頓可以成功護級，結果上周六真係主場大勝利物浦3:1，拎到護級重要3分。當然呢場勝仗只歸功於方濟，就抹殺晒修頓眾將嘅功勞。小弟之前品評修頓，已經話佢哋班波攻力冇問題，上半場單睇波衫顏色，球迷恐怕以為身穿紅衫嘅係力爭前4嘅利物浦；修頓全面圍攻，列基林拔、積洛迪古斯好運啲，球隊又點止贏兩球。不過小弟已講過，英超護級戰，防守比進攻更重要，中堅出身嘅普捷天奴，確實又改善到球隊防守。不過一場勝仗，對修頓護級形勢仲未可以放鬆住，站在球迷角度，修頓又富娛樂性，又夠進取，點都希望佢哋留喺英超。文：牽牛