財爺鬍鬚曾噚日出席商界午餐會，推銷自己份「防左」預算案。佢話自己好鍾意《帝國驕雄》，引述入面其中一名句：「我們的所作所為必定流芳百世！」自誇情況就如佢份預算案講明唔會亂使錢一樣，其後仲將之改寫為「今天所作所為，會對將來有長遠影響」，擺明暗寸打算靠大花筒贏取民望嘅狼振英喎。
會上有人問，周邊唔少地方都想抄香港，想用低利得稅吸引外資，問鬍鬚曾有乜嘢計仔突圍而出？講得直接啲，即係想政府減利得稅啦！鬍鬚曾就話香港稅制已經好低，加上利得稅喺香港係主要收入來源，香港九成公司唔使交稅，由1,400間公司交七成利得稅支撐大局，所以減稅真係冇得傾！