前「新聞之花」趙海珠唔做法巴輪后，暫時唞唞湊仔，遲吓先重出江湖。珠珠今年1月順利誕下麟兒，升級做阿珠媽，轉眼亦坐完月，不過佢冇返工，反而遞信唔撈，話想專心用多一、兩個月湊仔，遲吓先積極搵工，轉換工作環境。
珠珠老公Vincent做物流生意，家境不俗，珠珠生完仔，想專心做少奶奶都好正常，咁啱聽聞佢噚日遞信唔撈，即刻打電話恭喜佢上岸啦；點知佢話係一場誤會，佢確實辭咗職，但係唔打算全職湊仔，只係諗住換個工作環境。
唞一唞 想轉做主持人
「06年尾離開電視台，轉做窩輪，到𠵱家都有六年，覺得係時候轉換工作環境，接受新挑戰。」至於將來想轉做乜呢？佢暫時冇心水，淨係話未必做番傳媒，多數留喺金融界，希望做啲對人嘅工作，例如公關，如果有機會，做節目主持人都可以。
講番兩個零月大嘅「珠仔」，似阿媽一樣咁精靈可愛，𠵱家有14磅重。珠珠生完仔之後都算收身成功，佢話，減多6磅就回復原本體重，希望過多兩個月，以最佳狀態成功搵工，下半年就可以復出。珠珠粉絲即管等吓啦，不過，話唔定遲啲又有女主播轉做輪后呢。
李華華
mailto:[email protected]
新game出爐 ～ 快啲試下自己有無辦法上車啦！
【「樓」年運程小測試】
http://www.tomonews.net/game/hkhousingpolicy/