馬主C、馬主P與馬主N三人合作養馬三年，隻馬最叻贏過一次季軍，由第三班降到第五班，今季初出兩次，大敗而回，想不到一轉入蛇年，馬運轉好，年初三就贏出頭馬，點知馬主P當時去咗長野滑雪，拉頭馬冇佢份，不過一班鬧事老友一於嘈住佢地要請吃慶功宴。做馬主就是這樣的，養馬輸足三季，養馬費百幾萬，唔可以呻肉痛，一旦苦盡甘來贏番一場啫，就會被一眾親友祝賀，以為佢贏到開巷，實則馬主P只係買咗一千蚊獨贏。
好嘞，早早幾個星期預訂咗上星期四到順德聯誼會吃午飯慶功，點知飯還未吃，隻馬在三月十日再下一城，變咗連贏兩場，於是到咗三月十四日，大家一坐低，就嘈到拆天，興高采烈之至！順德聯誼會之大魚羹、炸鯪魚、炒豆苗、柚皮鵝掌等菜式，根本就無得彈，可惜乳鴿就差啲啲嘞。左丁山向三位馬主要求，「呢餐原本係慶祝贏第一次頭馬嘅，點知好事打孖嚟，上星期日升班又贏，你地好應該再請多一餐喎！」其他老友高呼贊成！
食到飽一飽，於是從順德聯誼會行過去IFC再轉往置地廣場，行一個大圈，馬主P就去咗樓下嘅上海印書館睇書，順便買咗一本《宋詞小札》，此日天氣突然從熱轉冷，街上冷風吹得左丁山震一震，記起辛棄疾「摸魚兒」：「更能消幾番風雨，匆匆春又歸去，惜春長恨花開早，何況落紅無數。春且住！見說道，天涯芳草迷歸路……」馬主P性好讀書，學識廣博，贏馬興奮過後，細讀《宋詞小札》，不知會否「休去倚危欄，斜陽正在，煙柳斷腸處。」贏馬與宋詞似扯不上邊，不過歡呼過後，讀宋詞往往有此感觸。
行到太子大廈，碰上以前嘅禁毒專員，政務高官盧古嘉莉，佢離開政府已有幾年，曾為退任特首董建華打理基金會事務，問佢現在是否已退休歸家，盧太遞上名片，原來已是老牌珠寶店K.S. Sze & Sons（金星）嘅董事總經理，金星在上海創辦於1923年，遷港數十年皆在太子大廈開店，以傳統鑽石珠寶著名，盧太叫左丁山得閒就去金星揀番一兩件，講笑咩，金星係上海幫／外省闊太嘅至愛名店，左丁山呢類人邊有資格，左丁山去周大福都係限於「純參觀」啫。