【特稿】
38歲的Joel在花園街大火發生前半年租住192號唐樓劏房，歷劫火災逃出生天，去年已獲編配公屋，他慨嘆「要用咁多人命換番嚟，其實好可悲！」另一居民67歲謝祥坤指：「有人恭喜我，我話要死咁多人先可以上到樓，有乜嘢值得開心？」
「畀唔到教訓啲人」
Joel慶幸當日在夢中驚醒，及時從後樓梯逃生，僅口鼻和手腳熏黑；住194號六樓劏房的謝祥坤則在外上班，兒子謝啟宏身受重傷，與葬身火海的女友廖海燕天人永隔。
謝表示，兒子雙眼受創送院，一度擔心兒子失明，現時算是康復，但不可受強光刺激。兒子仍需定期見心理醫生，對女友的死未能放下，不敢踏足花園街半步。
日前Joel和謝祥坤重臨舊地，他們沿花園街步行往舊居，看到兩旁排檔相比以前井然得多，行人道寬闊，以為大家安全意識已提高，但行至192至194號唐樓地下，只見入口堆滿垃圾，原來只是假象。
他們沿樓梯拾級而上，站在舊居門前，感觸良多。Joel直言，衞生比以前更差，「有陣味，感覺好似只係油咗一層油。咁多人死咗都畀唔到教訓啲人，好失望！」兩人批評本港劏房問題依然存在，謝怒斥：「我好想問特首，幾時先會關心基層啲住屋問題？」他們希望當局全面檢討劏房及防火安全問題。
《蘋果》記者
街坊意見
希望搬出 林太
住客林太自大火後一直想搬出，希望政府能收購大廈。
提高意識 鄺女士
窗簾店店主鄺女士防火意識提高了，在店內加裝不少防火措施。
影響生意 劉先生
檔販劉先生表示，大火後排檔被整頓，生意因而下降。
