無綫為鞏固電視霸主龍頭大哥地位，昨日出動38位小生花旦大晒冷，以新劇造型亮相為香港國際影視展撐場，跟來勢洶洶的王維基「香港電視」抗衡到底，每日燒銀紙等政府發牌的王維基，昨未有安排藝員出現影視展攤檔宣傳，十分輸蝕。
由「魔童」王維基揸弗的香港電視，苦等了三年零四個月，有傳將於本月底獲得政府發牌，一場電視大戰即將展開，無綫和亞視都嚴陣以待，趁昨日在灣仔會展舉行「2013香港國際影視展」，無綫搞大型攤位宣傳，昨午由助理總經理區偉林，親率陳豪、胡杏兒、黎耀祥、陳法拉、陳展鵬、謝天華、徐子珊、苗僑偉及周麗淇等38位藝員出席TVB 2013隆重鉅獻記者會，晒冷宣傳新劇以壯聲勢。
杏兒玩色誘任咀
眾演員穿戲服落力宣傳劇集，黎耀祥有份演出《巾幗梟雄之諜血長天》及《傳愛事務所》，他選擇以《巾》的黐鬚造型亮相，祥仔說：「今年拍三部劇，《巾》講打仗要瘦啲，減咗五、六磅，我要露好多肉，好多嘢睇，自己呢個年紀練唔到大隻，但修線條靚啲。」同樣有份演《巾》的杏兒透露有好多咀戲，她說：「之前同蕭正楠拍kiss，可能金剛都有份，我都唔想太濫同賣弄，劇本未寫完，唔知同幾多個人kiss，劇本寫到好激，但電視尺度有限，我做特務要美人計，怕自己唔夠女人味，會參考《色，戒》。」
至於法拉以律師look宣傳《傳愛事務所》，有傳男友薛世恆的父母慶祝結婚40周年影全家福？法拉愕然說：「吓，點解你哋收到風，我收唔到？」問到沒邀請她會否感酸溜溜？法拉說：「真係唔知，我哋有聯絡，間中有食飯。」同場的陳展鵬將接拍五部劇，他多謝公司給予機會。
此外，香港電視攤位設大電視播劇集和綜藝節目宣傳片，《三面形醫》、《警界綫》、《我阿媽系黑玫瑰》等，由於沒有藝員撐場，場面冷清。
採訪：楊潔雯
攝影：仇志德
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/