香港人對滙豐有着一種莫名的情意結，不過這間英資大行，近年早把香港人的好感消耗得八八九九。接連捲入醜聞被巨額罰款不特止，連最基本的服務水平，亦早已令人不敢恭維。
有在滙豐工作的朋友坦言，「5號仔」公佈業績那一天，他打開那本用波音747做封面、寓意滙控（005）再起飛的年報，覺得好「心噏」。事關香港舊年稅前盈利按年升30%，以效益嚟講早已冠絕全球，成本效益比率（CER）低到得39%。
用大家比較易理解的說法，即係滙控每出1蚊，香港人就可以幫集團賺到2.56蚊，而同時間美國和歐洲就只賺到1.67及0.93蚊，香港跑贏人地一倍都唔止。但過去數年，滙控喺香港裁員力度，卻同環球睇齊。
今年5月，滙控會再推新一個三年計劃，英國《Financial Times》已披露滙控會考慮再裁員5,000人，以達到佢CER的目標。滙控過去幾年，賣出的業務多達幾十項，裁員逾10%，早已瘦晒身。如果呢隻747仲飛唔起，問題會是再裁員可以解決？低息環境下滙控要重回紅底股，要搵的恐怕是新業務增長動力，以及希望那些罰款一如CEO歐智華所說，真的是一次性吧。
海迪