西九文化區視覺藝術博物館M+嘅建築設計方案最快要到今年中先揭盅。不過西九管理局似乎唔想市民等到頸都長，近日管理局網頁已經上載咗一份藏品名單，除咗介紹著名收藏家烏利．希克先前向M+「半賣半送」嘅1,463件中國當代藝術品，仲有400幾件M+最新搜羅嘅藏品資料。
M+藏品總共涵蓋幾百位藝術家嘅心血，包括內地著名當代藝術家徐冰同岳敏君，本土代表都有李傑及白雙全。
香港人最熟識嘅內地維權藝術家艾未未都有26件作品「上榜」，包括多幅象徵對抗強權，以「中指」指向北京天安門、美國白宮等象徵權力機關嘅黑白照片；同埋諷刺權威同傳統嘅《可口可樂罐子》。