歐洲小國塞浦路斯出事，相距逾7,000公里的港股照樣當災，恒指二萬二關一度失守。歐盟開出的救助條件相當辣，要塞國銀行向存戶徵稅最多10%，直情係打劫散戶，隨時引發暴動。條件咁苛刻，無非係「大蝦細」，如果當地國會唔通過存款徵稅，銀行體系隨時崩潰，仲要退出歐元區。
有評論認為歐盟唔會見死不救，但呢幾年歐盟已先後救助希臘、愛爾蘭、葡萄牙及西班牙，今次已經係第五國，仲頂唔頂得順？如果花太多錢救助相對重要性不高的塞國，萬一日後法國、意大利出事點算？所以魏力大膽估計，塞國將會是被遺棄的孤兒，最終脫歐並不出奇，到時引發的震盪難以估計。
恒指方面，以黃金比率睇下個支持位是21700，如能見底反彈已屬萬幸。萬一塞國出事，就要考驗250日線21000，也是黃金比率0.5倍關。以目前港滙走勢，短期技術反彈後，下試二萬一機會甚高。
板塊方面，藥股屬較強勢之選，東瑞製葯（2348）估值較平，技術走勢亦佳，可以留意。本周五（22日）將公佈業績，雖預料會倒退約兩成，但預測PE僅10倍，PB得1.3倍，平同業太多，昨大成交升至1月以來高位，可小注投機短炒，業績前出貨，博一成左右回報。
魏力
http://www.facebook.com/2012jason