阿仙奴上周三歐聯，作客贏番拜仁慕尼黑2:0，最終因作客入球唔夠對手多而出局，但都算爭番啲面子。或者係痛定思痛，踢到咁攰由德國返英國，又要遠征位於威爾斯嘅史雲斯，都一樣交到貨，靠蒙利爾同謝雲奴嘅入波，兩球淨食天鵝；「讓球主客和」開到[-1]「客勝」，買咗嘅朋友真係筍，有3.7倍咁和味。
兵工廠贏波後，對佢哋爭前4亦好有幫助，𠵱家同周日先對韋斯咸嘅「4哥」車路士只係爭兩分。波士雲格賽後就強調，最緊要係隊波建立番信心同鬥志，作客連贏兩場，實在唔易做到。
值得一提係成日俾網民笑嘅謝雲奴，自從踢完非洲國家盃返嚟後，根本冇踢過幾多場，查番佢上一次幫阿仙奴入波，已經係上年10月4號歐聯分組賽，主場贏奧林比亞高斯，大家爭啲唔記得咗原來佢仲喺度。