【適可而止】
除了希望政府重用拍賣方式賣地外，富豪酒店（078）執行董事范統認為政府近期推出的「辣招」經已足夠，除了趕絕炒家外，更意外地影響上車客的買樓意欲。
范統認為梁振英政府的確很有決心壓抑樓價，但卻出現反效果。他說︰「我唔會話政府好心做壞事，但有啲政策係咪適得其反呢？好似佢出招斷絕短炒客，個市仲係好旺，咁再出招杜絕長炒客，但估唔到有side effect（副作用），趕絕埋上車客。好似雙倍印花稅係咪需要咁高呢？」
他又指一個健康的樓市除了一手市場，還要二手市場，「就好似股票咁，長期冇成交，隻股票都唔健康，𠵱家二手市場靜晒，冇可能單靠一手市場嚟供應。」
對於早前長實（001）拆售雍澄軒酒店，范統表示，旗下部份酒店雖同樣可拆售，但基於法律責任問題，集團「冇諗過會賣！」他表示公司未來兩年仍有四間酒店落成，房間數目突破5,000間，「我哋鍾意經營酒店多啲！」