今季NBA出現唔少傷兵，最弊係傷親件件都係big names！湖人前鋒加素因為腳傷而缺陣咗18場，日前練波又出事，可能有排都唔出得㖭！而已經有A史杜達米亞唞到季後賽嘅紐約人，周日作客快艇可能冇埋安東尼同真達拿兩大將，灰到冇朋友。
加素拜恩又傷又病
湖人巨星拜恩之前對鷹隊扭傷腳，上場贏溜馬打咗12分鐘就退下火線，周日對帝王上陣成疑，佢仲喺twitter自爆患上大感冒，扭傷又病真係禍不單行。而佢好拍檔加素都唔好得幾多；呢位西班牙前鋒右腳有傷，2月到𠵱家都未好番；上周六練完波又出事，話右腳感到痠痛。湖人話佢周日會去專科檢查吓，再公佈最新消息。不過講到咁，明眼人都知加素又排未復出，而且好可能要收「咧」㖭呀。
另一邊快艇真係揞住半邊嘴笑；笑得出因早前手踭撞傷嘅前鋒卡朗畢拿，今場可以復出正選鬥紐約人，而對手3大猛將全數缺陣！紐約人前鋒A米因為要做膝蓋手術，已經講明要唞6個星期。點知周日作客快艇賽前，教練活臣又有壞消息宣佈：「我哋喺操練中諗過，安東尼同真達拿唔會上陣比賽。𠵱家我只可以用其他人頂替。」安東尼個位都仲有今季打得唔錯嘅高柏蘭頂住，但係另外兩個位要用馬田同卻迪湯馬士兩位老將頂硬上，諗起都牙煙。