歐陽震華（Bobby）同關詠荷噚日喺大欖沙灘拍無綫新劇《情逆三世緣》，病好嘅Bobby比之前仲鬼馬，現場有唔少師奶fans爭住同佢合照。被問到之前入ICU搶救，Bobby話令自己更注重健康：「𠵱家冇以前咁高估自己，以前會玩得好盡，𠵱家會七、八成就夠，工作咗咁多年原來積勞好多，身體有好多暗湧連自己都唔知。拍完劇老婆要我好好休息，佢話今次令佢好驚。」
對住醫生飲酒
之前傳Bobby係因飲酒過多出事，仲有冇飲酒？佢話：「都冇乜飲，只係上次請一班醫生食飯時，喺佢哋面前飲咗少少。」噚日劇情講Bobby因三失想自殺，關詠荷出言開解，Bobby搞鬼作狀跳海，關詠荷好配合咁拉住佢隻腳。
關詠荷話之前Bobby入院令佢得益：「今次真係託佢鴻福有得休息吓，喺TVB拍劇以嚟未試過返三日休一日。」但遲啲荷姐因要返內地開工，所以要第一次同囡囡分開十幾日。
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/