近期財圈熱話應該係邊位高價投得「唐之水滴」，同埋邊位買入長實（001）劃時代拆售嘅葵涌雍澄軒。據聞，成班有頭有面嘅股評人，喺長實開售雍澄軒當日都收到電話，叫佢哋優先認購，仲可以安排經紀幫手摩貨，聽到人人心癢癢。究竟有幾多人真金白銀攞錢買呢？遲啲睇土地註冊處資料就知嘞。
謝絕好意者：買咗冇得鬧
土地註冊處陸續披露雍澄軒買家資料，暫時大約披露咗兩成，股評人當中就有金利豐證券研究部執董黃德几，同埋中信証券國際執董林一鳴，佢哋有冇收到電話只有佢哋先知。之但係，幾位資深股評人不約而同承認曾經收到電話，叫佢哋優先認購。
一名不願透露姓名嘅股評人爆料，指「長實賣雍澄軒嗰日，我四點已經收齊資料，六點就有電話打來，話可以優先認購，仲話可以搵經紀幫手摩出去。」雖然聽落條件好吸引，但佢聲稱，怕以後鬧個盤都鬧得冇咁爽，所以就冇買到。
敢言股評人 聞到97味
另一位以敢言見稱嘅股評人亦收到電話，指對上一次收到呢類叫佢做優先認購嘅電話，已經係97年樓市高峯期嗰陣，令佢即刻提高戒心，謝絕對方好意。
退休都得嘅股評人就慶幸自己趕唔切接電話，佢聽聞好多行家都收到電話，對方講到輕易賺到幾十萬，「轉吓手賺幾十萬喎，聽到都吸引啦，如果我接到電話，話唔定都會買㗎，𠵱家反而就要大叫好彩啦！」
好唔好彩其實要睇長線，泡沫未爆都未知嗰個係咪泡沫，不過誠哥出名眼光準就真嘅。
李華華
mailto:[email protected]