【本報訊】在旅遊界打滾十多年的何燕珍，去年4月發現患癌，經8個月與死神搏鬥，她終於步出醫院，「我同自己講，如果我可以行得出醫院，我一定去做有意義嘅事。」
當她得知同業為達成Masa心願到貴州建校，深受感動，決定不理家人反對隨團做義工，「我5歲囡囡都話，媽咪你要顧自己身體呀。」女兒後來也將手套及圍巾等聖誕禮物捐出，讓她送給山區學童。
四日三夜的行程，每日十小時崎嶇山路的顛簸，身體仍未完全復原的她，強忍頭痛、心悸等化療及藥物副作用，堅持到多間學校做義工，「我雖然不幸患有惡疾，要承受肉體上嘅痛苦，但相比山區貧窮學童嘅苦況，好似失去父母嘅孤兒，我呢點痛算乜嘢？我都會秉承Masa精神，乜嘢都可以輸，鬥志不可輸！」