【上海直擊】內地女星湯唯噚日喺上海宣傳新戲《北京遇上西雅圖》，男主角吳秀波都有出席，同場仲有一對孖女同一個小男孩，有小朋友喺度零舍熱鬧。原來孖女喺戲中演吳秀波嘅一對女，小男孩就係扮湯唯個仔，小男孩可能太入戲，一見湯唯就扭抱，不過小男孩唔輕，搞到湯唯抱住佢時谷到面紅紅，一陣就冇力，但小男孩唔肯落地。主持問小男孩叫湯唯做乜，唔知係咪親生媽咪在場，佢都只係叫湯唯做阿姨。
「緣份是找不到的」
喺戲中湯唯同吳秀波演情侶，問戲外有冇擦出火花？吳秀波笑話：「這是取決於個性，現實我更壞，她就更儍。」湯唯聽到就答：「他都說我儍，我可以說甚麼？」有人將呢套戲同舒淇拍住葛優主演嘅《非誠勿擾》相比，湯唯只係話：「看劇本已心動，拍出來效果也很好。」咁現實中遇到啱對象未？湯唯話：「這不用我去找，對的人會等我， 緣份是找不到的。」跟住湯唯換咗件透視露背晚裝出席晚上首映禮，但因為落微雨，所以佢都拖實吳秀波以免跌親出洋相。
撰文：洪紅克
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/