商業社會能者居之，交唔到數就要下台，Groupon行政總裁同資生堂社長是活生生的例子。特區政府做嘢幾監粗嚟，都不能視民意為無物，董伯伯都要問責啦。強國為官之道可以唔做嘢、可以漠視民意，惟獨唔好阻住班老細搵食，否則好似以下兩位，要「燉冬菇」㗎。
上周市場傳中行長肖鋼將出任中證監主席，郭樹清要起身調任山東省省長，官方未證實，但市場盛傳係因為郭樹清唔聽話，大刀闊斧整頓證券業，得失咗國有銀行老總。點解咁解讀？事關十八大就有個人辦──工行董事長姜建清。
《WSJ》形容姜建清是「成於商業，敗於仕途」，09年強國大舉放貸抵抗衰退，他擔心草率放貸會蝕錢，成為四大行中最唔進取的銀行，獎賞是他成為唯一冇獲得晉升的行長。同樣，內地傳媒形容郭樹清是最忙的中證監主席，為進行「零容忍」改革，推出規則達65項。兩大人辦，多大志氣都俾黨磨滅晒，仲講乜反腐倡廉，加幾多維穩費都冇用啦！
Samantha
本欄逢周一、三、五刊出