老戲骨江毅上周因病去世，即時令人諗起佢喺《大時代》同《竊聽風雲2》裏面扮演股壇大鱷嘅精湛演技，隨即諗吓三色台會否食住個勢重播《大時代》，答案係短期內唔會，換言之「丁蟹效應」未嚟，唔會踩多個市一腳，股民可以放心。
TVB外事部副總監曾醒明讚揚江毅係實力派演員，但佢哋安排好晒未來一季嘅節目，暫時冇打算作出調動；其他原因包括江毅喺《大時代》入面唔係主要角色，又離開TVB一段時間，翡翠台現時通常重播20至25集、短啲嘅劇集，所以短期都唔會重播《大時代》嘞。
照咁講，股民暫時唔使擔心「丁蟹效應」襲港股。不過《大時代》嘅對白真係充滿睿智，江毅飾演嘅股壇大鱷陳萬賢對住演丁蟹嘅鄭少秋講：「股票之道在於人棄我取……你幾時見過成村人買股票會發嘅啫，來來去去咪得幾個人！」幾啱喎又。