星級財經分析員陸東落區？！華華噚日經過銅鑼灣維園，發現陸東個嘜頭出現喺新民黨嘅banner上面，同黨嘅區議員謝子祺同黃楚峰似乎「成功爭取」陸東幫手同街坊講投資心得，下月中開壇。
葉劉淑儀2010年底創立新民黨，睇資料，陸東同葉劉應該係friend底，同年9月南區區議會補選，陸東已經幫葉劉搞嘅匯賢智庫參選人劉應東站台，舊年4月謝子祺主辦「陸東投資講座」，今年再接再厲。
陸東一向有叫座力，周不時替金融機構、地產代理或者傳媒主辦嘅投資講座做演講嘉賓。陸東上月中曾經估計，大市上半年表現好過下半年，中資股最值得關注，鋼鐵、建材股宜趁調整吸納。唔知內地上周爆出海砂風波之後，陸東會唔會有其他推介呢？