希慎（014）宣佈業績之時，順帶宣佈重建新寧大廈與新寧閣，預計2018年新廈落成，可比現時增加四分一建築面積。餐飲M聞此消息，怏怏不樂，問佢點解，佢話：「現址有一間可能係全港最旺嘅特色酒吧Inn Side Out ，改建後一定失蹤，既話新廈2018年落成，現有租戶在2015年或之前要搬走啦。Inn Side Out 嘅特色係有一大截露天坐位，顧客可在此吸煙，剝花生，唔知幾爽，平時旺場唔特只，周末好天氣兼有足球直播嘅話，更是塞到爆，氣氛好到極，我好鍾意去㗎，冇咗嘅話，好多港島酒吧客冇咗集體回憶，會好失落！」
左丁山只係光顧Inn Side Out 一次咁多，冇乜回憶，但去一次就知道戶外吧氣氛特別，為別處所無，相信改建成新廈之後，幾難會有一條露天私家行人路可以做酒吧咯，從此香港特色又少一樣。
不過三十幾年來，香港市容不斷轉變，隨時代、經濟環境而變，無謂呻。這日與餐飲M傾偈之後，地產基金經理S請吃午飯，到香格里拉酒店夏宮，論食物，夏宮似乎不及香宮，不過勝在就腳，由中環行去金鐘，二十分鐘啫。地產S自從恢復獨身之後，大概晚上幾得閒，居然有時間整理80年代兒子出生時嘅街頭照片與八米厘紀錄片，地產S話：「平時唔多覺，睇番舊片，先發覺香港街頭街景轉變咗好多、好多。」不過佢做呢一行，有份參與改變香港市容，亦係無謂呻，仲有時間嘅話，不妨將啲舊片數碼化，放上YouTube，讓廣大觀眾一睹1982年中環、銅鑼灣、金鐘舊貌。嗰陣時，太古廣場還是軍營地段，與現在完全不一樣。
地產S話吃過飯後就要為新基金籌募資金，去外地路演，第一站先去東京，一個星期內會飛到腰頸皆痛，好辛苦。同席有一位年青投資關係總監，來自投資銀行，年青人話：「我啲舊同事先至辛苦呀，依家做IPO未必有out-of-pocket（代支費用）可收，客戶要慳錢只肯支付一筆固定費用，由投行全包，投行用自己錢就特別慳家，我啲舊同事為一單IPO飛去歐洲路演六日五夜，只有兩夜住酒店，其他三晚就在飛機或火車趕路睡覺慳番酒店房租，返到香港，佢地三個人直情面無人色！」唔少叻仔叻女，誓要做i-bank，唔該訓練吓體能先。