比較內地A股、港股、美股同日股估值，就會發現以市賬率（PB）計算，美股估值最高，截至上周五，標普500指數PB 2.33倍，滬綜指、恒指同日經平均指數分別係1.66倍、1.49倍同1.52倍。
雖然指數嘅行業結構、成份股數目對於比較估值有重要關係，甚至應該拆開唔同行業嚟計先正確，但呢個過程相當複雜，仲要計到最後就會發現唔係蘋果同蘋東比較。
恒指成份股得50隻，遠比其他三個指數少，入選股票應該係精英，理論上值得較高估值，但係市賬率偏低、盈利表現反覆不定嘅地產股、金融股佔大多數，所以又要折讓番轉頭。不過，指數仍然係比較各地估值嘅最快捷有效方法，晉佳惟有死死地氣照用。
資產價格偏高需折讓
估值唔同，仲會有唔同嘅因素影響：（一）財政狀況、（二）資產價格水平、（三）會計制度唔同。
簡單啲睇，中港股市裡面，唔少公司持有物業資產，但係兩地商業、住宅物業價格都喺高水平，所以谷大咗盈利同資產，投資者明顯係防備資產價格下跌兩成之類，所以畀佢哋較低市賬率。
至於美國企業方面，自然揸多啲美國物業，而當地樓價處於低水平，資產價格偏低，未來資產有上升空間，所以市場畀佢哋較高市賬率。喺眼見美國樓市遠比中港抵買嘅時候，美股市賬率較高嘅情況下，大家仍然睇好美股多啲，其實並非唔合理。
樓價高同樓價低，影響投資者對於市賬率嘅睇法，落差可以好大。喺1997年樓市高峯期，恒指市賬率頂峯係2.4倍；至於2000年科網股熱潮，樓市低迷，市賬率可以升到去3.5倍先見頂，反而投資者會自然因應當時資產價格，去為股市估值。
如果同一邏輯放喺𠵱家，樓價較低嘅2010年11月，恒指市賬率2.1倍就見頂嘅話，恒指今時今日就好難有本事上到市賬率2.1倍見頂，可能只得1.7、1.8倍，就咁睇嚟，目前港股估值充其量算合理，唔好猛話好平嘞。
晉佳
本欄逢周一、三及五刊出