喺金融市場，好多時眼見未必為真，魔鬼總在細節裡，好以上周五大市成交過千億，好多股份都喺尾段捱沽，表面睇係大凶之兆，查實係富時中國及香港指數調整成份股同比重，搞到最後一分鐘成交咗200億銀，獲納入指數的騰訊（700）及百麗（1880）不升反跌。
睇業績都一樣，只着眼盈利升跌隨時中招。好似之前熱炒的遠東環球（830），去年轉蝕1.4億銀，其實下半年賺近3,000萬元，生意亦比上半年多27%，北美業務重組後表現唔錯，管理層認為2013年毛利率仲會再提高。
隨着美國經濟復蘇，樓市見底回升，大家都忙於搵受惠股，可能會遺忘咗呢隻幕牆股，日後只要阿媽中國建築（3311）多多關照，畀晒啲海外業務佢做，生意會多到做唔切，呢招亦係當年中國海外（688）培育中國建築嘅方法。股價在1月極速倍升炒到上3蚊，上星期曾跌落2.34元，業績後開始企穩，可趁機在2.60元買入，重上3蚊唔難。
唐牛