政府將南區港鐵上蓋黃竹坑地皮批予由梁粉鄭家純旗下新創建、星洲百匯班台和港大合作的財團，興建私家醫院，這醫院項目其實醞釀多年，養和醫院本也甚感興趣，不過研究過和計過數後，覺得醫院位於港鐵之上，對磁力共振等高科技醫療儀器會有影響，再加上批地協議有一半要用作公營醫療，賺錢十分困難，最後放棄。連養和都唔敢去馬，鄭家純和坡佬組成的財團為甚麼咁勇？
沙膽虹綜合各方意見，得出的結論如下：新創建集團不怕蝕本，最好是私營醫院未來十年都蝕本，那麼就大條道理跟政府講數，將部份地皮改為興建豪宅。該地皮位處南區，樓面地價已過萬元一呎，到時一鋪翻本有突，乜都返晒嚟，唯一就是希望梁振英能生生性性繼續連任。新加坡百匯班台醫療集團進軍香港，則是希望以此打響頭炮，將來進軍大陸保險醫療生意，在國內大城市建醫院，幫他們相關公司買醫療保險的，就可享用他們旗下醫院服務，即使這個項目蝕少少，都冇所謂。至於港大醫學院呢？則最老襯，畀咗個生招牌人家用，美其名叫甚麼教學醫院，其實是每年大批實習醫生，為醫院提供了大量「廉價」勞工，幫手睇症就真，難道純官答應咗港大醫學院，捐番筆錢畀佢哋？
沙膽虹
twitter賬號：khcheung1