羅賓漢嘅故仔相信大家都聽過，呢位俠盜專劫富濟貧、鋤強扶弱。𠵱家英超都有隊羅賓漢，呢隊波叫利物浦，專殺強隊，但就得閒送分畀弱旅；今次受益嘅，就係打緊護級戰嘅修咸頓。
1:3不敵修頓
利物浦前一輪對住排名高過自己嘅熱刺，仲係威係勢，落後緊都可以反勝3:2；上周六作客護級分子修咸頓，以為佢哋9成唔會甩轆，但偏偏踢到走晒樣。6分鐘已因為後防掛住睇波，俾修頓嘅舒尼達連輕鬆喺門前射入，之後列基林拔射入罰球領先到2:0；雖然菲臘比古天奴幫紅軍喺完半場前追番1:2，但成班後防喺80分鐘，再睇住對方嘅積洛迪古斯舞龍咁入禁區射入，最後輸1:3，認真丟架。
老實講，紅軍呢幾年一直都係呢類海鮮波，今季亦有好多例子。好似聯賽兩循環對曼城，俾人睇死會失分，但兩場都和到，仲要踢得好過對手；作客打和阿仙奴同車路士亦一樣，攞唔晒3分都戥佢哋有啲唔抵。
但係對住中型班，紅軍就突然變咗第二隊咁，俾西布朗雙殺、主場1:3不敵阿士東維拉、足總盃俾英甲弱旅奧咸淘汰，真係遇強越強，遇弱越弱。啲中下游球隊對住利物浦，就好似見到羅賓漢咁，知道呢位英雄（水魚）今次又嚟「派錢」！
QPR多得佢唔少
記得利物浦呢場之前英超3連勝嗰陣，領隊羅渣士仲口口聲聲話要爭前5踢歐洲賽，今次賽後佢唔敢再提呢件事，淨係死狗咁話修頓值得贏。不過，紅軍今次「濟貧」幫修頓，就害死昆士柏流浪（QPR）喇。
QPR之前兩連勝，一度見到護級曙光；當然今輪直接作客輸畀維拉2:3，係自己唔爭氣，但都要多得利物浦無端端送3分畀修頓，一下子令QPR同維拉、修頓拉開番6、7分差距。我求大俠心諗，QPR同降班區另外兩隊雷丁同韋根，真係多得紅軍唔少。QPR領隊哈利列納賽後就畀自己目標，未來9場波贏5場就護到級，仲話有信心做到；佢哋煞科戰就會對利物浦，唔知到時呢位「俠盜」救唔救到QPR呢？