八方同事去咗梵蒂岡朝聖，咁啱撞到以前有「社運技安」之稱嘅中大前學生會會長黎恩灝。他鄉遇故知，但差啲唔認得佢呀。事關暫別香港半年嘅黎恩灝，瘦咗成幾個碼，塊包包臉唔見咗，以前肥嘟嘟嘅身形，亦變得相當之「紮實」。唔通新教宗剛上場，神迹就降臨「技安」身上？
正喺英國留學嘅黎恩灝話，舊年暑假已不斷喺中大做gym減肥，但效果未如理想。去到英國，由於住喺教會嘅學生宿舍，生活有規律，食得清淡，加上要步行20分鐘先返到學校，又節食又做運動，令體重有明顯改善，fit咗好多。黎恩灝舊年出發前，唔少社運人士仲擔心佢學成歸來，會變咗另一個蔡子強，相信𠵱家各位可以放下心頭大石啦。