「何家淑女，帶了七分性感三分酒醉……全無意做妥協的她厭了，凡事諸多規矩」這是多年前何超儀主唱的《何家淑女》，歌詞中表明了她的態度。近年報紙雜誌上的何家淑女多了何超盈、何超雲、何超蓮及何超欣等，第一代何家淑女超儀都打算翻唱這首歌。不過在實行這個計劃前，醉心音樂的超儀近日的新搞作，是先翻唱80年代四位當紅歌手的經典歌曲，延續四人在舞台上的妖，向他們致敬！
撰文：李珮洳
何超儀最近推出翻唱碟《八十再玩》，翻唱了她最愛的四位80年代歌手梅艷芳、羅文、張國榮（哥哥）及陳百強（Danny）的歌，近日四出宣傳的她更以80年代打扮及化妝示人。
梅姐 胸墊見面禮
超儀原來是梅艷芳的超級粉絲，因為胞姊何超瓊的關係，她比fans幸福，可以在家中與梅姐見面，「我記得第一次見梅姐係12、13歲，嗰時屋企管得好嚴我冇得出街，每晚最期待嘅事就係等家姐蒲完返嚟講番當晚嘅事畀我聽，所以我細細個就聽埋好多蒲界秘密。有晚家姐返嚟叫我估吓佢見到邊個，之後喺個袋拎咗張梅姐簽名相畀我，上邊仲寫住Dear Josie，拎住張相好似發夢一樣。跟住家姐仲要同我講下次約咗梅姐嚟屋企BBQ，我嗰時真係癲咗。」
此話一出，超儀便構思了一個別開生面的歡迎儀式迎接偶像的到來，「我揀咗一件當時好潮嘅泳衣，但當時我好肥，嗰時我係見到草蜢入門口先，我已經跑出去，之後跳落水，點知上水時泳衣有一邊胸墊浮咗上頸，真係辳到爆。不過我冇後悔咁做，起碼梅姐記得我，嗰個下晝我係咁煩住佢問佢問題。」
哥哥 被鬧兩鑊甘
接着便輪到與張國榮見面的第一次，超儀多年前到文華酒店high tea，坐在二樓的她看到哥哥步入酒店大堂。與哥哥素未謀面的她即衝到哥哥面前大叫：「哥哥，我家姐叫我問候你，我家姐係Pansy（超瓊）呀。」哥哥見到眼前的死𡃁妹，原來是好朋友的妹妹，即時用手蹺着超儀的頸，超儀邊說邊發出會心微笑：「我嗰陣真係溶咗呀，哥哥喎，佢蹺住我呀！」
不過超儀曾被哥哥豪不留情的當眾責罵兩次，「有次家姐帶我去蒲，16歲有得出去蒲梗係覺得自己好威，嗰個年紀又會認為講粗口好勁好型。我喺吧枱前面好大聲將所有識嘅粗口講晒出嚟，點知畀哥哥聽到。佢即刻捉住我嚟鬧，仲問我『你知唔知自己係邊個呀！』佢嬲到叫我家姐捉我走呀。」
第二次被哥哥當眾指摘是在慶功宴上，百厭的超儀因為貪玩激嬲了黎小田而被罵，「以前有個電流嘅玻璃球，一隻手放上邊另一隻手掂到人就會過電，我見人就電，點知電到黎小田飛起。佢之後同我家姐講，哥哥知道又出嚟問我係咪好得閒，話我太細個唔應該喺呢啲場合，最後又係鏟走我啦。」
雖然兩度被偶像責罵，但沒有令超儀對哥哥的愛有半點減退，「佢係鬧我，但都成日鼓勵我㗎，我之後唔敢再講粗口，當你識到一個自己崇拜嘅人，你係會好聽佢話，好過屋企人同老師講一百句呀。」
Danny 拜服想法新
由於何超瓊與陳百強是死黨兼蒲友，超儀見Danny的次數最多。面對俊俏的Danny，身為少女的超儀卻不敢有半點遐想，「邊敢同佢有遐想呀，同埋佢真係大我好多年，唔會有嗰種feel。印象中Danny份人係好柔和、好溫文，未見過佢發脾氣，同埋佢好有自己想法，仲要係好另類嘅想法。」
籮記 鼓勵要Rock
超儀入行後才遇上羅文，籮記一句話對她影響深遠，「我喺台灣出道返香港，籮記見到我同我講第一句說話係『你把聲唔係唱主流音樂㗎，你唱rock啦！』呢句說話好似好普通，聽真啲即係籮記有聽過我嘅歌啦，同埋佢睇嘢真係好清晰，知我係要唱rock。」
為了向四位80年代的殿堂級歌手致敬，超儀揀選了哥哥的《拒絕再玩》、《藍色憂鬱》、梅姐的《飛躍舞台》、《蔓珠莎華》、《裝飾的眼淚》、Danny的《創世記》、《煙雨淒迷》和籮記的《激光中》八首歌翻唱，她表示現時的樂壇不論歌曲及造型都無人能及這四位歌手，她希望能延續四人在舞台上的妖。
攝影：林德雄
髮型：Ben Chow
化妝：Ling Chan of ZING the makeup school
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/