與樂壇天后楊千嬅相戀，經濟實力懸殊，丁子高一直背負「女尊男卑」的標籤。丁子高婚後發奮圖強，開公司、炒樓再開公司，近年已見成績。但他堅持不借助妻子的財力和名氣來發展事業，兩夫婦在生意和投資上均保持高度財政獨立，深信不讓感情摻有雜質，才能相愛到白頭。
記者：李芳芳
丁子高在新開張個多月的公關公司內接受訪問，從出身、打工談到自立門戶，全無千嬅身影。夥拍太太做生意似乎未曾出現在他的日程上，他斬釘截鐵說：「一定唔可以發生，兩個人相處係一個學問，將唔開心嘅嘢帶返屋企，係希望另一方令自己開心番。但如果兩個人都因同一件事唔開心，我同佢都幫唔到大家，影響小朋友，同埋成個屋企嘅和諧，我唔想衍生呢啲問題。始終兩個人嘅關係簡單啲，真係我愛你，你愛我，keep住就白頭到老啦。」
財政獨立 互不干預
父母在丁子高18歲時離異，對其產生較深的影響，「媽咪係幫爹哋做嘢，兩個都好有性格，做嘢好叻……日日返到屋企都時刻講緊做嘢。」父母關係的演變，令他決心避免與太太有工作交纏，「如果一齊做生意、投資，突然間多咗啲雜質入去……將來有小小嗌交，（雜質）會變成某啲理據，搬晒出嚟就大把嘢嘈㗎啦。見得太多，兩夫妻嘅關係要長遠，一定唔可以有雜質喺裏面。」
從公開資料細心查找，兩人結婚三年多以來，都沒有共同物業和生意，所住的陽明山莊單位只是租賃；僅有一間千嬅全資擁有的公司，丁有出任執行董事。他解釋，是為方便在她離港時，幫忙簽名處理文件，等於秘書。夫婦間不會管束對方財產，亦無聯名戶口，日後亦會避免。「投資版圖越來越大，意見開始唔同；我唔會問，呢啲嘢係佢自己嘅，佢都有自己嗰部份嘅空間，唔使同人分享㗎嘛。」與太太唯一牽涉到錢的地方，只有「買嘢畀對方，我會負責屋企主要開支，但佢要買嘢嘅，佢買囉！我唔會突然間去幫佢買件演唱會嘅衫。」
兩公婆的投資王國各自精采，千嬅善於炒豪宅賺錢，丁子高亦自覺炒樓運不遜於太太，事實確從未損手。他08年開始與的士行太子爺鄭子邦夾份入市，賺到有七位數的人生第一桶金，「屋企人都有畀錢，賺咗還番個本，就一路投資。」兩個好友其後索性以顧問公司名義買賣，各佔一半，2010年一口氣買下銅鑼灣美漢大廈上下層兩個300呎單位，其後兩年升五至六成沽出，火速賺250萬元。「阿邦（鄭子邦）對投資物業、股票好在行，日日睇住個市場，我冇時間研究，所以我會同可補到我短處嘅人一齊合作。」
炒樓有運 從未損手
丁子高現時仍有持有小量物業放租收息，面對政府新一輪「辣招」也不急於放售，「會暫時睇定啲，半年後或有少少回落，但香港市場好快會適應，市場始終有班太有實力嘅人，唔覺得樓市有好大問題。」
股市上，他則缺少這種眼光，「一定唔會再買，買過，衰過，呢個遊戲唔係我哋玩㗎，除非有日遇到個人令我覺得贏硬。」他有點尷尬地笑了出來。在05年股市轉向一片暢旺的時候開始，他沉迷過兩三年，蝕過至少數十萬元，「好多人打嚟，個個都話堅，好多即日買賣，有個心癮係越來越想賭……我有半年時間迷得滯，返工都不停望住部電腦，但唔知點解會輸晒。𠵱家只係儲吓人民幣，買黃金掛鈎產品，冇交畀人打理。」
看似掘金路上互不干涉，丁子高卻毫不掩飾太太是促使自己創業的原動力。「去另一個階段，係要有好大嘅推動力，呢個當然係識到我太太，08年開始諗呢個係好好嘅結婚對象，有咗家庭，自己都要有啲嘢去做㗎，咁就的起心肝試。」在只有簡單佈置的新辦公室內，丁子高坐在唯一的梳化上，回想「立國」的初衷。
公關老闆 兩次創業
在三十而立那年，丁子高完成「齊家」，09年與千嬅在美國註冊結婚。補辦婚禮後，他離開工作七年的傳藝公關（IPS）自立門戶，但當時他獲4A的恒美廣告（DDB）業務總監Conrad Ng重金禮聘，加入發展公關部門，故由老闆再變打工仔。直至合約去年結束，他立心再開公司，說服Conrad五五出資，預算投入最多400萬元，合作開設collaboration group。今年1月下旬在鰂魚涌東港中心開張，僱有近廿名員工。
比較兩次創業，他說，從新公司名字可知是做綜合營銷。經過在DDB的兩年拓闊眼界，他發現自己原來所認識的很皮毛，對綜合營銷有重新認識。他相信，這種新模式在市面有生存空間，已註冊在上海開分公司，計劃年底前成立。客戶想當然千嬅是公司的生招牌，請千嬅出騷可有折扣，但丁直截了當說：「一定唔會平啲，都係要經我太太所屬經理人安排。」
秘密武器 搵BB錢
兒子亦促使他接連創業，「有咗Torres（兒子）之後，發現𠵱家用緊嗰個『產品』唔係最好，喺坊間亦搵唔到最好嘅。」丁子高於是聯同有35年嬰兒用品生產經驗的廠商朋友，邀請德國某嬰兒品牌，針對亞洲研發生產一個產品，期望年底前可在本港大型分銷商上架。
這次他的投資高達七位數，取得大中華區獨家代理權，「唔可以透露係乜產品，我想一做就要爆。」這個產品最終能否成功，正正考驗丁的營銷功力，但他聲明不會讓兒子為產品做宣傳。
34歲的丁子高踩盡油門拼搏事業，自然令人聯想到是為逐步拉近與太太的差距。當年兩人關係曝光，外界焦點都落在比較兩者的身家地位，他不諱言這段姊弟戀初期確有壓力，「目標冇話要超越佢嘅身家，喺自己行業做到一定成績已經好滿足，好想得到社會更多嘅認同，唔係幾多錢就代表好叻嘅。但好欣慰，唔係有一家大細要我養，畀到我好好嘅環境創業。」
丁子高（Real）
原名：丁浩霖（Gary）
年齡：34歲
學歷：奧克蘭理工大學計算機圖像設計一年級
背景：父親為上海造紙商丁永方，堂兄丁子峻是在內地發展的演員
家庭：與樂壇天后太太楊千嬅育有未足1歲的兒子Torres
事業：
1999年：大學期間參加無綫電視的全球華人新秀歌唱大賽，其後加入華納唱片
2000年:為唱歌輟學，與另外三人組成男子組合VRF，推出兩張唱片
2002年：到上海幫父親打理製衣和造紙生意
2003至2010年：加入黃德源創辦的傳藝公關廣告公司（IPS），從普通員工晉升至項目總監
2003年：與朋友合資180萬元在灣仔開酒吧1520 club，07年賣盤
2011年：自立門戶，成立公關公司RM Workshop，半年後結束
2011年中：與恒美廣告（DDB）簽約成為發展公關部門的策略夥伴
2013年1月：與恒美業務總監Conrad Ng合資成立公關公司collaboration group