寫篇「奶粉湊孫」，立即收到一位讀者（在職媽咪）來電郵大吐苦水兼大駡左丁山未搞清楚就亂噏。
睇完呢封長電郵，左丁山對在職媽咪周圍撲美贊臣奶粉嘅苦況，十分同情，如果日日咁辛苦，真係人都顛。但根據讀者W嘅訴苦個案，最抵鬧者就係美贊臣啫，呢隻奶粉最暢銷，但熱線電話服務奇差無比，累晒街坊，要政府代開熱線電話為美贊臣賣奶粉（呢樣嘢就搞到納稅人想喊），美贊臣先至要改善服務態度。點解有咁多香港BB食美贊臣奶粉，左丁山唔知，要問啲媽咪。但左丁山問過一年內產子產女嘅媽咪一共六位，位位都話佢地嘅BB唔食美贊臣嘅，唔食美素佳兒嘅，買奶粉好輕鬆，返工好安心，廣告對佢地嘅奶粉選擇毫無影響。
咁乜嘢影響佢地嘅選擇？一位話自己做BB時，食S26長大，細佬又係、表弟妹又係，所以自己生咗個女，S26係自動選擇。另一位話老早睇中咗一隻澳洲奶粉，另外其他四位話嬰兒出世時，醫院姑娘派奶粉，剛好不是美贊臣、美素佳兒或牛欄牌，而係其他，故此出院後就繼續食。好彩啫，呢啲奶粉周圍有，唔駛撲。
如此看來，醫院派第一餐奶粉，有決定性影響，既然所有兒科醫生，衞生署都話過，發表過聲明指六個月或以下嘅BB奶粉須嚴格根據世衞標準配製，隻隻牌子奶粉嘅原材料及成分比例相同，那麼初生嬰兒吃甚麼奶粉，應該一樣。讀者W話佢試吓大仔（三歲）轉奶粉（只吃早上一餐），大仔立即話肚痛，大便好硬，於是立即食番美贊臣A+，隨即無事。醫生講過轉換奶粉有一兩日甚或長啲嘅適應問題，並無大礙，不會有礙嬰兒健康，如果兩樣揀一樣：（A）轉奶粉，嬰兒適應期一星期，媽咪肉痛；（B）撲美贊臣奶粉撲到身心俱疲，精神恍惚，驚足成年；左丁山會毫不猶疑選擇（A）。目前情況好清楚，全港並無奶粉供應不足問題，只有美贊臣或者美素佳兒出現供不應求現象，高永文應該捉住呢兩家公司講俄文，而不是一竹篙打盡一船人，傷害香港自由港聲譽。讀者W從美贊臣用家出發，大讚限奶令有效，只可惜其他不少奶粉成為犧牲品。