業績期到，記者會上常問到的一條問題，是大股東或管理層對股價及前景的看法。有別財演及大行濫用「被低估」語言，管理層向來對股價睇法守口如瓶，最多輕輕帶過。但總有部份按捺不住指被低估，但實情是低處未算低，越呼冤越激動，語言「偽術」越明顯。
埋怨股價不如多做實事
股價高與低、平與貴，並無指定準則。你有貨，自然認為「被低估」，仲有得去，相反沽完貨卻自我感覺好貴，股價「被高估」，一切都是源於利益關係。
作為公司管理層或大股東，最簡單是「做到嘢」，交出成績，唔使出聲股價自然會升。反觀埋怨被低估，終日留意報價，這些公司要避之則吉。
去年三月放榜，產銷減肥茶的碧生源（926）盈轉虧，董事長趙一弘指股價被低估，考慮適時增持。結果，年內確實不斷增持，股價卻無起色，由放榜後至今累跌56%。
最經典不得不數中國金石（1380），去年3月派業績虧轉盈，但股價由2011年3月至2012月3月，累跌83%，當時董事長陳濤在記者會上如此呼冤，「這是嚴重被低估！我們有兩座大理石山，又有現金流，毛利率也很高，這真是不理性的行為，我會立刻以個人名義買這股份，因為這真是很便宜。」強國式的辯解，結果陳董三個月後就跳船，金石去年9月份停牌至今，隨時渣都冇。
一隻股份長期偏低或落後同業總有原因，但最終仍以業績為依歸。公司表現改善，不是朝夕的事，在春江鴨滿佈的時代，好公司業績曝光前，一早已經炒起。
長期積弱，表面誇啦啦，估值又超平的股份，股榮相信少部份禾稈冚珍珠，但更多是糖衣毒藥。
《大時代》金句值得回味
少時候睇《大時代》，尚未了解江毅叔金句精髓，近日回味，別有一番滋味在心頭，「唔識玩股票又學人玩股票，結果被股票玩到團團轉……你幾時見過成村人買股票會發達啦，來來去去都係得嗰幾個人。」
股票難測，人心更難猜度，借來江毅叔八字金句送給兩個弒親人渣：「咁多人死，唔見你死！」
股榮