周末早上，懶洋洋的落街吃個早餐之際，若果響街頭撞着周潤發的話，你會點？昨天的我正是面對此情此景，腦裏面第一反應係影相，facebook，但正在猶疑應該係偷拍定合拍時，佢已經捧住一堆書遠去，街尾嘅幾位清潔叔叔嬸嬸見到影帝，大大聲咁嗌發哥發哥，發哥又笑笑口咁Hello Hello，夠街坊，好鬼warm。
細細個對於見過面嘅明星，總係有非常兩極嘅印象，一係覺得佢好人到癲，一係認為乞人憎到極，原因？純粹可能係佢對我笑咗一笑，又或者係「藐」咗一「藐」，咁我就梗係將佢無限放大啦，「嘩，佢幾好人呀，笑呀對住我！」；「嘩，佢正衰人呀，『藐』我呀竟然……」而響無限放大嘅背後，查實各位大人物根本就無心博你like定乞你憎。發哥出街一身街坊裝，冇黑超冇cap帽，大概就係用行動話畀大家知，明星都係常人，唔好有太多幻想，而佢自己亦樂於享受明星們原本應該冇嘅自由，同新鮮空氣。
還記得八、九十年代有八卦雜誌做過調查，就係娛樂明星響市民心目中嘅認知度有幾高，結果譚校長有成百分之九十八嘅人識，一個係出街係人都識嘅人物，應該係點生活嘅呢？我哋替佢擔心之際，結果幾十年來你睇佢個個禮拜都仍然悠然自得踢衞生波，人人都咁friend，你想話同佢影張合照，佢就奉旨四萬咁口，就算你摸下佢肚腩仔，都冇話反面。
又記得外國又有八卦雜誌做過巨星在地球上嘅知名度調查，結果發現去到非洲沙漠同內蒙古都有人識碧咸，人氣勁過畢彼特，全世界都識你，個人係咪唔同啲呢，結果發現碧咸去睇NBA時一樣睇女仔，響BBC節目一樣肯扮camp camp地，響歐聯嚟緊對巴塞唔知有冇得出場，常人一個。
美斯夠勁啦，大勝AC之後換件波衫都順得哥情失嫂意，你睇佢平時畀球迷衝入場熊抱時嘅唔知點咁，非常細路，一啲都唔messiah，聖人都係講番新教宗啦，之不過少年方濟原來都試過求愛不遂食檸檬。
教宗當選後有防彈房車唔坐坐大巴，發哥就至愛搭地鐵，越唔明星，越明星。
keyman
now TV主持
mailto:[email protected]