熱火勁爆！NBA東岸1哥熱火上周五作客公鹿，就算有後衞獲迪早段撞傷頭部，靠住勒邦占士同保殊均貢獻28分，球隊作客照樣大勝107:94，取得21連勝；只要贏多兩場，就可以打破火箭聯盟第2高連勝紀錄，不過嗰場對手會係塞爾特人（見附表），而綠軍主將皮雅斯，就出嚟話希望熱火之後場場都輸，睇嚟熱火連勝路有暗湧噃。
熱火獵「鹿」締21連捷
今仗對住暫排東岸第8、季後賽首圈有機會碰頭嘅公鹿，熱火後衞獲迪第1節初段上籃，就俾公鹿中鋒辛達斯撞低，後腦先落地，要由軍醫攙扶下離場接受檢查。好彩客軍3巨頭中，仍有當旺嘅勒邦占士領軍，佢全場貢獻28分同10籃板球，而「三弟」保殊亦回勇，同樣射入28分。獲迪經過檢查後，第2節重返賽場，亦貢獻咗20分，協助球隊以13分大勝。
熱火自2月1日不敵溜馬後，已延續21連勝，獲迪將連勝走勢歸功於前鋒柏迪亞嘅演說：「當時我哋睇完超級碗，柏迪亞賽後發表佢嘅睇法，之後我哋一直贏落去；佢將一啲生活道理同超級碗連埋一齊，係一次好好嘅演說。」
熱火只要周日作客贏埋速龍，就追平火箭喺2007/08球季嘅22連勝紀錄，而且𠵱家氣勢如虹，分分鐘有權上望湖人喺1971/72球季所造出嘅33連勝紀錄；不過當中會面對唔少勁旅，包括作客塞爾特人、公牛、馬刺等。綠軍前鋒皮雅斯更揚言會阻止死敵：「我根本唔會關心佢哋連勝，只係希望熱火之後場場都輸。」
占士成最具影響力運動員
就算綠軍幾憎占士都好，大帝上季包辦常規賽同總決賽MVP，難怪獲彭博通訊社選為2012年100大最具影響力運動員之首，壓住2、3位高球嘅老虎活士，同埋美式足球嘅P曼寧。
至於同占士一時瑜亮嘅拜恩，之前俾D鍾斯整到隻腳豬蹄咁，上周五仍然紮住對溜馬，雖然打得12分鐘兼捧蛋，但喺後備席做到嘢，又做助教又做啦啦隊，結果湖人險勝99:93。
