艷星洗底難，有錢仔要洗底也不容易！麥浚龍（Juno）02年入行，至今已過了十個年頭，他的路並不平坦，出道時噓聲多過掌聲，直到05年憑歌曲《雌雄同體》奪得叱咤獎項，大家才對他稍為改觀。Juno也對自己做音樂的方向更明確，之後每年邀請不同歌手和音樂人合作，一年推出一隻概念碟，久而久之，大家眼中的Juno不再是有錢仔玩玩吓，一切正如Juno所說：「最重要係你之後要付出比其他人多嘅努力去做所謂嘅洗底。」洗底路雖漫長，但總算為自己爭回啖氣。
撰文：李珮洳
草蜢、軟硬、倫永亮、關淑怡和何韻詩均曾在麥浚龍的概念大碟中出現過，在香港樂壇推出概念碟的歌手不多，自05年開始Juno決定了自己的唱片路向，貴精不貴多兼慢工出細貨，慢的程度，可以將一隻碟分拆兩年做。之後有人可能又會引申到「有錢」的問題，Juno坦言現時根本不可以奢望出唱片賺錢，所以幾年前已尋求另一條出路，就是拍電影。
「唔好怕俾人鬧」
出道不久就被扣上「有錢仔唔憂做」的帽子，Juno早已將這個問題放下，他日前接受訪問說：「如果你要做呢行，就唔好怕俾人話俾人鬧，你一定要搵到自己個目標係乜，唔係搏命係咁做就有成果。你行過左邊呢條路行唔通，咪行番轉頭行番右邊嗰條睇吓有冇出路，揀定咗就算難行都要行落去。」
近年樂壇出現了幾位有家庭背景的歌手，如王梓軒、梁佑嘉（Abella）和朱紫嬈，當中Abella曾拍了一個旅遊節目在無綫播放做宣傳，引來不少爭議。不過Juno對這幾位歌手的新聞一無所知，不過身為過來人的他卻有一番見解，他說：「有邊個新人唔需要唱片公司做宣傳，新人就係要畀公司設計出一個形象，甚至要經歷大公司嘅洗禮。同埋家庭背景呢個問題絕對唔好咁擺上心，只係有人將呢個血緣關係放大嚟睇，最重要係你之後要付出比其他人多嘅努力去做所謂嘅洗底，但呢個話題可能會跟你一世。」
Juno奉勸新晉歌手要知道自己想要甚麼，究竟是想見見報做一個紙上明星，還是真心想做一個歌手，他續說：「唔好做一個面目模糊嘅人，目標要定得清晰，如果你入行係為咗見吓報咁好易，如果想真心做呢行真係唔好怕俾人誤解，俾人誤解俾人話你唔好唔開心，仲要接受唔同人嘅批評，始終你唔可以滿足晒所有人。」Juno更提醒新人不要為了獎項去工作，他認為口碑比獎項來得重要，得到好的口碑，便證明到別人有留意自己所付出的努力。
其實Juno入行以來緋聞不多，似乎只有鍾欣桐（阿嬌）一位，而正式承認的女友就是戴庚玲（Janine）。他與Janine拍拖一年後分手，早前情人節卻被影到在中環撐枱腳，Juno表示現階段會以知己來形容與Janine的關係，他說：「一直以嚟我對感情事都好低調，就算你話我老套我都係答你順其自然，我都係一個普通人，我唔會因為怕而唔同朋友出街食飯，我唔會因為咁而避忌。」
曾想18歲結婚
就算哥哥麥浚翹早前已成家立室，Juno沒有半點衝動結婚，他說：「細個就有諗18歲前結婚，因為我覺得同老婆一齊讀大學係一件好浪漫嘅事，咁轉眼就過咗18歲啦。同埋我真係一個宅男，唔鍾意出街，舊年成年就匿喺片廠拍新戲《殭屍》同埋做後期，拍拖都要時間，所以我真係冇時間去諗結婚呢個問題。」
能夠將自己的興趣變成職業實在是一件幸福的事，所以Juno更加懂得感恩及珍惜，眼前的一切比起以往的抨擊來得實在，他說：「太多產又會俾人話，太少產又有人話，咁不如揀自己鍾意做嘅事同方式去做。只要用心聽過我嘅歌、睇過我拍嘅戲，就知道我冇馬虎。做呢行真係唔好同人比拼，keep住有熱誠先可以繼續行落去。」
化妝：Khaki、Kris Wong
髮型：Derrick（Queen's Private i）
愛玩Crossover
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/