【隔牆對論】
物極必反。10年前香港被沙士重擊，經濟、民生奄奄一息，董建華政府急求援北京，開放自由行北水南調救港，開閘的後果卻是一發難以收拾，自由行遊客數目逐年急升，已取代歐美遊客，成為本港旅遊第一大戶，已屆本港負荷的臨界點；市民抱怨日常生活受影響，自由行掀動的舖租狂潮，扭曲營商環境，兩個生意人，面對自由行，打開門口做生意，各有故事。
記者：翁煜雄 袁樂婷
記：《蘋果》記者
蔣：印尼餐廳1968負責人蔣翹帆
旺角瓊華中心不再跟小店續約，改為租予大公司；彌敦道有逾100間鐘錶珠寶店，吞噬小店。如此都會怪象，同時在銅鑼灣上演。老店如利苑粥麵專家，灰飛煙滅，或像印尼餐廳1968，無鞋挽屐走。
記：自由行被認為推動經濟，你認同嗎？
蔣：佢哋幾乎只掃珠寶、鐘錶、名牌，或內地缺乏嘅奶粉，但對飲食唔太重視。以我哋禮頓道舊舖為例，遊客顧客都係歐美亞洲客，雖然時代廣場咁近，內地客好少過嚟，都擠喺快餐店，身邊放住大堆名牌紙袋。
記：銅鑼灣逾百萬元租務成交2008年僅1宗，2012年狂升到35宗。能承接天價租金都是珠寶鐘錶甚至藥房，你有壓力嗎？
蔣：禮頓道舊舖月租原本係10萬元，2011年尾三級跳到30幾萬。難道真係要將一碟飯由80幾蚊加到200幾蚊去交租嗎？所以只好忍痛搬離呢間陪伴我哋成長嘅老舖。業主當時冇心續租，講價機會都冇。
記：你對這長於斯嘅社區有甚麼感想？
蔣：銅鑼灣數十年來都係旅遊區，無論係早年嘅歐美客，或後來嘅日本客，都來者不拒，但點都會保留一點自我。軒尼詩道珠寶店、百貨公司林立，但只要拐個彎走入橫街，就可搵到玩具舖、雲吞麵店，仲有我做𡃁仔時打躉嘅機舖。
今時今日，禮頓道舊舖已變成西裝店，林峯代言嗰間；旺中帶靜嘅禮頓道現都擠滿國際品牌。佢哋都將高昂租金當廣告費咋！銅鑼灣、尖沙嘴、旺角都似只為大陸人而設，我明白要面對現實，但咁樣係我哋想要嘅香港咩？
記：可形容一下與業主的關係嗎？
蔣：禮頓道舊店老業主，原係旁邊嘅松竹樓，因大家都做飲食業，似朋友咁共同進退。經濟好時，我哋唔介意加租，因蕭條時佢哋會減租。沙士爆發時，業主畀我哋欠租兩三個月，度過難關。
𠵱家冇呢支歌仔唱。1號交唔出租，即日下午已收到追魂call。我唔怪佢哋。松竹樓約十年前因價錢太吸引將舖位轉售，之後幾乎每兩年轉一次手，新業主都係投資者，話唔定都係摩貨，或者都急需租金嚟供款呢！
記：部份市民埋怨本地食肆越來越乏味，尤其與韓國、台灣嘅比較。
蔣：時裝店、食肆及超市都係turn over最快嘅生意，每件產品利錢唔高，但靠客流量去扯高利潤。如果租金佔成本10%到20%，仍有利可圖，但𠵱家比例更高，有啲甚至係50%。開新店裝修費貴，月租動輒數以十萬元計，必須一兩年內回本，稍有差錯連租也交唔出，仲話要創新？
記：還想開分店嗎？
蔣：我哋曾有四間分店，因租金等因素只剩中環一間。最近曾到上環蘇杭街覓舖位，一間200幾呎小舖也叫價10萬元月租，點做？
記：你自小生活在旅遊區，對旅客有甚麼看法？
蔣：點樣嘅地方就吸引點樣嘅旅客。香港曾係多元化城市，有人默默喺小店賣藝術品，有人喺旁邊大叫賣魚蛋，以前嘅旅客來到會到處鑽搵地道特色。今日主導嘅內地客，只係嚟買名牌、奶粉。
不過，問題在於香港本身已冇其他吸引之處。你睇韓國，幾乎每日在變，由自家化妝品，甚至培養咗歌劇文化，吸引唔同嘅旅客。
記：搬到中環樓上舖已一年，生意還好嗎？
蔣：起初有啲唔慣，70%熟客流失，佢哋睇住我同一對孖生弟弟長大。不過，新舖租金與舊舖（以往）租金相若，舖面卻大得多，龐大白領群令呢度座無虛席，假日都有市民跨區而來，生意較舊店更好。呢啲係唔係叫塞翁失馬？
記：你也認同社會始終會改變，再不滿也要面對現實？
蔣：我爺爺當年喺印尼就推着三輪木頭車賣炒飯，父親後來到港，1968年在銅鑼灣開印尼餐廳。𠵱家由我哋接手。不過，中環店都特別放一部仿製嘅木頭車，提醒我哋，世界再變，有啲嘢都係要保留下來。
mailto:[email protected]