由羅永昌執導、甄子丹主演的電影《3D冰封俠》爆破動作連場，當中一場講述甄子丹在青馬大橋騎馬追逐跑車的戲份，原本想借用往機場方向的青馬大橋拍攝，由於政府有關方面遲遲未覆，電影公司最後要花費過百萬在舊啟德機場複製橋景。導演及子丹昨日分別以「睇吓做唔做㗎啫」及「政府唔借咪要搭景」指政府助力不足。相對政府為荷李活電影在港取景大開綠燈，明顯有大細超之嫌，更遠遠不及澳門對電影業所持的合作態度。
甄子丹主演的電影《3D冰封俠》昨日在舊啟德機場的跑道拍攝，除導演羅永昌外，還有飾演時光穿梭，由古代來到現代的主角甄子丹及一匹白馬在場準備。舊機場跑道被佈置成青馬大橋一樣，整整三個足球場的範圍內，圍起兩層樓高的綠色布幕，出動了多部重型吊臂車，工程浩大。
「政府所有都借唔到」
子丹接受訪問時表示稍後會加上後期CG特技，將場景變成青馬大橋，他說：「政府唔借青馬大橋咪要搭景，總共用咗兩日時間去搭，因為要拍危險動作，所以借唔到。政府所有都借唔到㗎啦，警察總部、立法會、政府大樓都唔得。」
子丹表示在青馬大橋的劇情講述他騎着白馬，追趕坐跑車逃跑的內地演員王寶強等人，同時任達華帶領的飛虎隊以陸空追截子丹，最後他要跳青馬橋逃走。甄子丹希望能夠拍出像《職業特工隊3》（Mission Impossible 3）的效果出來，特別起用了一部360度的攝影機拍攝，他說：「所以請咗班荷李活特技班底嚟操作，呢部cam可以360度全景拍。」
對於未能實景拍大橋，導演羅永昌亦感到無奈，他昨日接受電話訪問時說：「政府唔借吖嘛，申請過但係借唔到喇。你點可以封到佢三條線，我拍嗰場戲係好大嘅動作，要拍好耐，同有關部門講過亦睇過景， 要用晒三條線，正式入過紙，不過都知冇得傾㗎喇。」
《泰西》澳門借景即批
導演表示其實政府有心的話，可以實施強風時的措施，開放下層通道讓汽車行駛，上層就借來拍攝，他說：「睇吓做唔做㗎啫，就算借，如果得四個鐘亦唔夠時間拍。」對於政府厚待荷李活電影而忽視香港製作，他說：「都係㗎，𠵱家要搭多個景都要幾百萬，你話政府講就話幫電影，實行起嚟係另一套，呢啲問題唔問我都知啦。」另外，《冰封俠》的投資方北京中盟集團發言人表示，在電影去年底籌備之時，已同時入紙申請在大橋取景，但到目前仍未有回覆，為免影響進度只有搭景拍攝。
相對於香港政府的封閉及冷漠，一埠之隔的澳門相對親切及開放，據知早前電影《一路向西2之泰西》曾向機管局申請借出入境的禁區拍攝時，被一口拒絕，就連用來訓練員工的佈景禁區都不肯借出。相反《泰西》向澳門政府求助時，二話不說就借出機場禁區任拍。
採訪：魯萍
攝影：陳慧安
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/