靚聲王2:蘇基:配音幫助演出

靚聲王2:
蘇基:配音幫助演出

90年代開始做配音員至今,街上人叫他蘇基多過古佬的古明華不時講:「老實講,我只係搵食的。」廿幾年來遊走於拍戲與配音之間,配音收入竟比演戲收入更高更穩定,起碼可以養妻活女供埋樓。人人話今時今日做配音冇前途,都唔係吖!佢補飛:「咁我又確係有啲天份,適合做呢行先至得嘅。」

記者:陳慧敏

攝影:陳盛臣、劉永發

自己都配唔掂自己

古佬:「剛入行嗰陣我都仲仍然用緊菲林配音,但我哋已經唔使一邊講對白,一邊忙東忙西地扮雨聲、做音效。不過一NG,全組人就要重錄幾分鐘嘅戲,好大鑊。」那時候所有配音員都會配埋主角。但即使係明星,要配番自己都好難,始終你在拍戲時「自由講」,跟配音時要「跟口型說話」不同;「到你做得番當日嘅語氣節奏,但經過個咪放出來,又變咗兩件事。」

配音時用私家收音機接收房內頻道的原音,配音會順好多。「佢養起我哋成家同個女呀!」

佢哋尊重錢多過個創作

進入數碼年代,今日配音統統都有電腦代勞。感情不夠、咬字唔正,甚至明星仔甩底,統統可以用電腦後期補救,NG?OK啦!淨係由講錯的那隻字重配就得。如此,事情就變得古怪。因為一般美國導演都會要求自己揀配音員,但香港發行商一句「都係搵明星配好啲」就會換人。古佬:「香港就係一個咁奇怪嘅地方,佢哋尊重錢,但身為創作人,係咪應該尊重創作?為了宣傳價值而換人,感覺好無奈。」

摩西帶我谷底反彈

《史力加》裏面的貓劍俠,是近年古佬配得最開心的角色,而且:「咁多套《史力加》,幾個主角都換過人,係冇換過我!」實在古佬與貓咪之緣始於動畫《埃及王子》的摩西:「其實當年Casting,發行商已準備定一個靚聲星做摩西,我不過是『搭貨』(即充數),後來導演覺得我好明白個角色,做得出應有的語氣,就選了我。有用心去做的,他們都記得。」想起當年古佬拍戲拍到灰灰哋,抱住「搵多個錢」的心態轉去配音組:「我當時諗點樣pick up番人生,只為搵食會浪費生命。雖然我向來都覺得自己好認真做嘢,但其實唔係咁認真去執行一件事,但呢幾年嘅磨練,令我花了四個月時間為蘇基準備,到演出時就做得容易了。呢個創作過程都好享受。」就好似走出紅海,谷底反彈一樣。

90年代《獅子山下》,同夏雨、李宗強等前輩一起配音。

古佬配音,表情會跟住劇中人物變,貓劍俠扮可愛時他也睩大眼?「用音效,唔使配音㗎!(隔兩秒)……都會嘅。」

May姐:壓力千斤重

在70至80年代,香港大部份外語電視劇集同電影都需要配音,那時候梅艷芳從來都不是梅艷芳。直至80年代許鞍華、徐克等不太滿意配音效果,就開始盡量使用現場收音,加上大量外語片抵港,香港配音員朝九晚十一都做唔完,包括60年代已經入行配音的May姐謝月美。「以前未有影印機,一份講稿一起看,配音員要預先讀稿,集中精神不能出錯。沒對白的時候配音員要兼顧其他音效,任何一點出錯,都得害全部人由頭開始再配過,累街坊。最緊要係一班老手如譚炳文可以一口氣配十分鐘兩頁紙不NG,作為新人的壓力特別重。」May姐說。

我一路問,佢同步數着我的節奏口型,我每講一隻字都被她同步窒到應,May姐:「嗱,我𠵱家配緊你個口喇。」

明星難度期

70年代後期到80年代配音業好景,好多配音員出來開訓練班。現在想入行?May姐:「先決條件要屋企有錢!呢幾代配音員人工太低,太多學生充斥市場,將人工壓低晒,甚至收唔到錢!30幾年前我半個月有七千蚊人工,加埋電影配音,一個月有兩三萬。當年做文員只得六百蚊月薪咋!」
不時要與明星合作,最困難不是配得不好,而是度期,「明星通常集中力好強,做甚麼事都學得快,工作態度亦夠認真,好似郭富城可以配音六個鐘唔去廁所,但最慘係冇期,如半夜三點阿Sa阿嬌來到已經攰到想死,之後要改又未必夾到期。咁惟有用後期製作,將把聲拉長縮短。對白錯咗就搵啲近似的配音員補番,但其實不容易呀。」

與阿Sa、陳奕迅合作的《踢躂小企鵝》,May姐亦有份配。

近年May姐較為人認得的配音角色有薯蛋頭太太。

熟悉的聲音

香港配音員的Fans,都說他們較內斂,不愛出鏡,平時看配音員訪問,來來去去離不開林保全(《多啦A夢》)、陳欣(無綫常用旁白佬)等,其實還有許多一直少出鏡,卻聽得耳熟的聲音。

陳凱婷 :

「譚炳文今日配音都仲好有中氣,對口型捉得好準,佢話一聽到角色語氣,已識得融入角色,技巧係比新一代好好多。」

曾為日本演員如竹內結子、香里奈、米倉涼子、韓國演員崔智友的專用配音員。本來專配少女角色,由為《鋼之鍊金術師》男主角之一艾爾凡斯配音後大受歡迎,就多配少年角色。

為《鋼之鍊金術師》艾爾凡斯艾力克配音,要拿住個罐,扮在鎧甲裏面的聲音。

《鋼之鍊金術師》艾爾凡斯艾力克

《天國的階梯》韓靜書

黃紫嫻 :

「我入行時已經可以用電腦NG無限次,咁樣好方便,但個人集中力會冇咁好呢!」

專配儍儍哋Cool Cool哋少女角色,最喜歡如《爆笑管家》桂雛菊、《星夢高飛》高惠美(裴秀智),都係傲嬌系,還有《xxx HOLiC》裏的莫哥拿。

《爆笑管家》桂雛菊

曾秀清:

「以前十個人入行得兩個人做到,𠵱家易咗入行,但質素真係參差啲。」

所配美女角色如雲,如《螢之光》雨宮螢(綾瀨遙)、《大長今》連生(朴恩惠)、《電車男》愛瑪仕(伊東美咲),《一公升眼淚》木藤亞也(澤尻英龍華),也是林心如劇集的專用配音員。另一強項是喊得,音樂一起眼淚自然來。

《一公升眼淚》木藤亞也

《螢之光》雨宮螢

入行條件即CHECK

想入行,最快途徑就是參加配音訓練班。謝月美:「以前我都會要啲同學先錄音做個小小的音質測試,睇你講說話有冇懶音,說話流唔流利,先至容易教嘛。」六大入學條件如下:

1.咬字清晰
2.音質好、不沙啞
3.反應良好
4.聆聽能力佳
5.能長時間集中精神
6.最好有演戲根底