講起配音員，想到更多人迷上日本聲優。漫畫節上每次請來著名聲優，平時沉寂的香港Fans洶湧而出，禮物、大字報，更甚係台上聲優以動畫聲線講任何對白（或者只是我聽不懂），都引起台下夾雜日文的沒命尖叫，熱血非常。今日適逢《C3日本動玩博覽》又來，又係聲迷出動的時候了。
記者：陳慧敏
攝影：劉永發、許有達
日本聲優迷：比明星更親民
沙生07年聽了平野綾配音的涼宮春日（《涼宮春日的憂鬱》女主角）即成其Fans：「第一眼見到涼宮我就覺得好可愛，到睇動畫時聽佢一開口介紹自己，嗰種霸氣得嚟又溫柔嘅感覺，好特別！」梳着兩隻藍辮子的GiGi愛上近年大熱的初音未來，07年由聲優藤田咲配音，加上電腦調音，最緊要係網上人人可以透過軟件給她寫新歌，做埋Production，集網民之力調出最美歌聲。GiGi：「鍾意佢係因為正常人唔會有咁廣嘅音域，雖然係電腦調出嚟，但都代表作者的精神嘛。」
少女們的眼光，鍾意就得，不願上鏡的聲優迷阿俊，卻搬出經濟研究：「現在日本經濟正走在『迷失廿年』，而其中對興趣保有熱情嘅『宅男』未受影響。當主流音樂大碟銷量勁跌至十幾萬，聲優大碟則升破十萬，咪有得比較囉。」於是近年常有聲優唱片大賣，水樹奈奈今年更第四度出席紅白歌唱大賽，俊：「以前就話得《超時空要塞》會銷唱歌的聲優，到90年代《亂馬1/2》、《美少女戰士》，幾乎套套都有聲優做埋歌手，佢哋仲會做主持、寫專欄，令到更多人留意佢哋。好似水樹奈奈宣傳會結束後，佢居然堅持同場內三千幾個Fans逐一握手，握咗幾個鐘！感覺比其他明星親民好多。」作為千萬人群中的小Fans，即刻有被重視嘅感覺，又真係幾好Feel。
香港聲優迷：冇人留意佢哋
日本聲迷們瘋狂，香港本地薑都唔弱。香港配音員同好會──聲色藝直播室今年已經16周年，幹事們由中學時代堅守至今，起步其實係郭志權Jimmy（即《龍珠》角色比達配音員，現已轉行）同好會，通過當年的本地動漫雜誌《漫畫周刊》、《A-Club》剪報了解配音員，在雜誌筆友欄上認識同伴集成同好會，推廣各種配音員聚會。最顛峰試過一個月搞三個配音員聚會，還有人專登搜集Jimmy的配音動畫，一段一段駁起舉辦播映會，連Jimmy睇到都好驚訝。
講起日本天王級的聲優，主幹事Carol仔：「地區唔同其實都冇得比較，細細個睇日本動畫已覺得日本嘅聲優已經明星化。香港嘅配音員都唔太鍾意出嚟畀個樣人睇，但演員做到傑出嘅角色會有獎攞，配音員無論用幾多努力配音，從來都唔太多人留意，我哋係咪應該支持番佢哋呢？」
香港配音員同好會──聲色藝直播室
facebook： http://www.facebook.com/groups/5817798250/
聲色藝專門雜誌
香港沒有的，還有這種配音員雜誌。裏面全是聲優的訪問，女聲優們全是純純鄰家少女樣，特徵係齊蔭黑髮；男的青靚白淨笑容可親，全是夢想一般的世界卻似觸手可及，睇到你躍躍欲試想躋身其中之際，重點來了。幾十個配音學校招生廣告，對象由小學生到中學、大學都有，以每星期一堂三小時計，學費每年已經三萬元，對想入行的中學生而言還真不是個小投資。
殿堂級駕到——置鮎龍太郎
香港配音員少人提，日本配音員卻能衝出國際，《C3日本動玩博覽》昨天開幕，有傲嬌系配音女王平野綾、殿堂級配音員置鮎龍太郎Special Talk Show！仲有港版「阿寶」林保全大戰日版「馬沙」池田秀一，聲優迷開心死。
我們預先同置鮎龍太郎Talk了幾句，入行23年今日已是殿堂級的他，面對今日唱歌跳舞作曲作詞寫專欄，十項全能的新一代聲優，他都抹把冷汗：「相比起我入行的年代，現在多了好多不同的媒體，做這一行的發展大了很多，所以越是多才多藝，唱歌又得演戲又得，加入配音界前途很理想。」從來，聲戀偶像始終份屬非主流，現在已完全不同，「以前公司會辦免費的宣傳活動給作品宣傳，但現在可以好似明星咁，有贊助商，開音樂會，而觀眾又肯買票支持。我不敢說聲優業在日本的地位提高了，但聲優業界有今日的地位，其實都係好多前輩的努力成果。」喔，前輩不就是你嗎？（笑）
置鮎龍太郎代表作
《男兒當入樽》三井壽、《BLEACH漂靈》朽木白哉、《網球王子》手塚國光等
C3日本動玩博覽2013
地址：香港會議展覽中心
日期：即日起至3月17日
網頁： http://www.c3hk.com.hk/