【隔牆對論】
記：《蘋果》記者
朱：太子鐘錶執行董事朱繼陶
沙士於03年來襲時，本港經濟驟跌谷底，開放內地客來港自由行救急。轉眼十年，太子鐘錶由只得4間分店，擴展至擁14間分店的連鎖集團，員工數目翻了四倍。朱繼陶認為不能否定自由行對本港經濟的貢獻，內地客佔九成生意額。
記：有人說受惠於自由行的只有珠寶鐘錶、名牌手袋等奢侈品行業，你同意嗎？
朱：自由行唔只買錶，仲對化妝品、飲食、相機，甚至連萬寧賣普通紙尿片、奶粉（也買），所有零售業同服務業都有好處。一般市民亦唔係冇受惠，旅客多咗就會創造就業。可能因為有自由行，清潔、洗碗工人都請多咗，酒店就當然好啦。你唔能夠否定自由行係對香港帶嚟好大裨益。
記：你們在旅遊區設有不少分店，租金是否構成很大經營壓力？
朱：係，𠵱家租金好貴，但冇辦法，就好似你釣魚，要去最多魚嘅地方；你做零售，就一定要去最多人嘅位置。
不過，呢個世界有競爭先有進步，有淘汰先有發憤。以前飛髮舖喺地下，後來上咗樓；跟住相機舖、食肆都慢慢上咗樓、落地牢。當租金去到咁貴，當然 luxury（奢侈品）係容易啲畀得起租，因為我哋賣嘅嘢個profit margin（邊際利潤）大啲，但其實到某一個程度都係支持唔到。利潤拎完之後仲要交租、交稅、人工，計計埋埋先知有冇錢賺。當租金起得太犀利，呢條數會計唔掂，計唔掂就要投降。你想做都做唔到，邊有人做蝕本生意？咁你唔做，咪有第二個人嚟做囉。
記：一般人唔需要大量奢侈品，有市民覺得街道被名店壟斷，影響日常生活。
朱：環境會一直變，呢個係時代巨輪，你冇法子，只能夠適應。一個城市嘅小區發展會慢慢膨脹，旺嘅地方會一直旺開去，例如由北京道、廣東道旺到去樂道、海防道。平嘅嘢淘汰咗，慢慢就會發展去橫街，譬如你鍾意食嘢咪去轉角亞士厘道；佐敦準備起高鐵，啲嘢開始貴，你唔鍾意一樣可以走入廟街，乜嘢都有，好平。90蚊碗雲吞麵又有，10蚊大大碗雲吞麵都有，係你自己選擇。
記：本土小店無法立足，很大程度是因為租金太高昂。如果由政府出手實施租金管制，是否可行？
朱：呢樣係唔得嘅。香港係自由社會，自由經濟社會就係用供求決定價格同經濟活動。政府一向採取不干預政策，容許自由發展。香港咁多年都成為全世界自由貿易最好嘅一個地方，就係因為少規管。所有嘢都有佢嘅存在價值，互相千絲萬縷扣住晒。你唔能夠特登去打壓咗某樣嘢，你打壓咗一樣，第二樣嘢咪冒咗出嚟囉。如果政府真係用呢招（租管），可能會令成個（經濟環境）失衡。你以為幫佢，但你一幫佢就會令到另一邊嘅人唔公道。
記：自由行人數應否封頂？
朱：無城市講到明唔歡迎旅客。停咗自由行反而係會影響民生，可能連洗碗阿嬸都冇嘢做。𠵱家出現咗個問題係將自由行同水貨客混為一談，其實唔應該畫上等號。自由行嚟嘅旅客就係旅客，佢係嚟走水貨嘅就係走水貨。大家知道原來走水貨嘅百分之六十都係香港人。如果你將自由行限制入嚟，你想醫治水貨而落藥落自由行度，係咪落錯藥呢？打擊水貨唔係旅遊㗎，係海關㗎。
我成日同人解釋，𠵱家內地人嚟香港，唔一定要靠自由行，佢哋好多係公幹，或者喺香港有投資，係投資銀行大客，隨時可以落嚟。就算你停咗自由行，咁又點？反而旅遊業議會可以做啲嘢。你好容易統計到，邊個時候係旺季，負荷唔到；邊個時候少啲人嚟，有空間可以放多少少。或者做多啲宣傳，鼓勵旅客淡季嚟香港，平均分配人潮，話唔定仲有效。
mailto:[email protected]
■旺區舖位租金高昂，惟有受自由行歡迎的名店負擔得起。
■朱繼陶強調，水貨客與自由行不應混為一談。
