今周聯賽後眾球星會回國家隊，迎接未來兩輪世界盃外圍賽或友賽；慎防佢哋本輪勒住踢，喜捧名氣隊，小心推敲。今天重心撐英超英冠下游隊，包括諸「神」庇佑嘅修咸頓。
先講題外話，有版面，唔使全文唔係話博上盤就係下盤咁悶；好似上周六重心捧西布朗2:1、3:1波膽，中到也是有運，雖然西布朗有盧卡古12碼唔入，但補時史雲斯入波明明冇越位可以追平，都畀旁證舉旗吹番轉頭；英超刺激，戰情如過山車，攻同級隊伍博賠率有時講彩數，波日日有得賭，看官無謂對一場成敗太上心。
先講一單上心會內傷嘅真事，好多人都好欣賞畸寶嘅新聞台，取材夠吉士兼有唔少靚女主播24小時陪住你；唔似無記，一場風雨，高班馬一眼見晒，不過畸寶嘅營銷手法一向受到大眾爭議，小弟上月又領教過。有日收到個電話，那位代表畸寶嘅sales哥仔話佢哋來季冇英超播，優惠我哋呢啲去年10月至續咗約客戶，先係未來3個月加我每月20蚊；然後由5月起至約滿嘅最後年半合約，每月減番20蚊。哈哈，當時一按計數機，即係成份約會慳咗200幾蚊。其實大家可以睇番月結單，佢哋個英超組合值幾多錢，咁侮辱嘅優惠，要我就範？即時畀我狂轟數分鐘，然後掛線。睇吓你5月英超收爐後，又會打嚟玩乜嘢花臣，唔通整番個最強德甲播波組合，話值80蚊？以上嘅心聲唔係發牢騷，係希望波友明白，有sales搵上門，務必小心應變。
回說心水，今輪專攻今晚兩級中下型班，明天則入場睇馬壇盛事打吡。本欄踩過唔少次包尾昆，不過今晚作客受讓同級嘅維拉，要掉轉槍頭。昆仔已兩連勝，證明呢班人嘅質素加上神級主帥列納，係恰到同級隊；佢哋班波近期用番星仔做中場主力，掃到好多波畀前線嘅獨食仔雷米或泰拉拔攻堅，又有森莫亞復出，贏波本錢大增；對手維拉最弱係中場組織，上次只贏頹晒兼賽後炒埋領隊嘅雷丁，點讓得起呀？
次選，有阿根廷領隊普捷天奴笑謂有同鄉、新教宗方濟庇佑嘅修咸頓。後者上仗作客諾域治喺雪戰下，臨完場前輸12碼不死，士氣大振囉；今次招呼有神級射手蘇亞雷斯嘅利記，勢被看淡。英超神射手阿蘇就好似阿根廷另一神美斯，孭起成隊紅軍；不過今場後佢會返烏拉圭領軍踢世盃外，戰意有無可慮？其實小弟蘋果波「神」，更信上晒力嘅修頓，打得番早前贏曼城嘅聖瑪莉球場威力！最後捧英冠黑池，上仗又係不黑，作客完場前反勝前列屈福特，迎來新領隊恩斯嘅首勝。後者球員時代畀紅魔費Sir賣走到國米，之後恩斯加盟宿敵利記，可見兩人關係有幾差；今晚回師主場招呼阿Sir之子領軍嘅尾3彼德堡，必傾力盡數！
（下次見報日期：30/03）
蘋果波神