【中環置地廣場】賈曉晨（JJ）同樊少皇撻着之後一直戀愛大過天，近日有傳JJ私自接job而激嬲老闆陳百祥（阿叻），令阿叻想唔同JJ續約。JJ日前就露口風話恨嫁：「如果事業冇太大進展，可能考慮結婚。」雖然JJ恨嫁，但原來樊少皇未ready同JJ結婚。
暫未想娶妻
噚日下晝3點，樊少皇一個人喺中環置地廣場一間男士服裝店買西裝，佢又試西裝又試領呔，跟住叫店員幫佢用手機影相，然後猛傳微信，估計係send畀JJ過目畀意見。樊少皇攞住袋戰利品離開時，記者問到佢JJ話如果事業冇太大進展就考慮結婚，樊少皇反問記者：「佢真係咁講？」之後佢話：「其實大家以工作為主，其他嘢唔諗住。」好明顯向JJ拒婚。
樊少皇買完嘢後，JJ就做柴可夫揸部GTR嚟接男友，二人都着住情侶黑皮褸襯黑超，問JJ係咪想結婚？佢就改口風話：「其實以事業為重先。」另外，前日白色情人節，JJ喺微博大晒同男友合照，不過之後佢好快刪咗張相。
採訪、攝影：彭琮然
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/