個市三日急瀉近千點後，終現技術反彈，唔少戰友鬆一口氣，但目前究竟係撈貨定趁反彈沽貨？魏力昨文判斷港股是中線向下，暫時看法未變，因此應趁反彈減磅，雖然已非最佳時間，但認清方向盡力減低損失，留得子彈在，哪怕冇股炒？
記得早排跟一位資深炒家吹水，佢講番07年「直通車」炒爆後，其實28000點已順利清倉，大賺咗一筆，但08年3月跌到21000反彈，佢又忍唔住喺23000水平入市，仲掃爆埋個倉，結果帶住成手蟹貨迎接金融海嘯，家陣仲有幾隻未返家鄉！佢結論係：高位大跌並不可怕，因為大筆利潤在手，止賺果斷好多；輸得最慘反而係博反彈，高位追咗坐艇，止蝕就難得多，結果拖拖吓就出事。
博反彈本身是高難度動作，而高位剛開始形成跌浪的股份，博反彈更易中伏。以金界（3918）為例，過去一年長升不跌，累積大量獲利盤，管理層剛批股減持，係相當危險的訊號，趁配股撈底的策略，今次應不適用。
市況逆轉，撈底可試試反其道而行，向近月最弱的基金股埋手，神州數碼（861）去年11月以來由15蚊碌落10蚊，昨以「破腳穿頭」大反彈6.3%，9RSI現底背馳，可小注博見保歷加通道頂部12.50元，跌穿10.20元止蝕。
魏力
http://www.facebook.com/2012jason