哭哭鬧鬧嘅韓劇、辛辣嘅泡菜，相信都唔及肥大叔PSY嘅《江南Style》咁「全球化」，連英國賓架都攞佢嚟做成功例子，噚日渣打集團（2888）行政總裁冼博德喺台灣出席經濟峯會，就叫台灣學吓南韓點樣營造品牌。
冼總裁話，台灣其實有好多優勢，例如高科技同電子業，但可惜西方國家都唔知台灣有呢啲威水嘢，南韓就唔同喇，佢哋嘅三星、現代（Hyundai）國際知名，韓國料理餐廳喺海外亦越開越多，《江南Style》仲唱到街知巷聞，呢啲就係品牌效應。
主打新興市場同亞洲嘅渣打盈利年年新高，由CEO講區內表現相當有說服力。之不過，去到人哋主場講呢啲嘢好似唔係咁好喎，話晒台灣都有好嘢，好似智能手機品牌HTC，演藝界有出爐奧斯卡最佳導演李安，唔算好輸蝕啫！