皮草大王鄧偉彬是馬圈出名的馬癡，其女兒鄧詠琪（Vicky）更青出於藍，豢養的兩匹賽駒都以「知己」命名，「我有心事都會同佢哋講！」上月，她的愛駒「魅力知己」以99倍大冷門爆冷殺入本周日的香港打吡大賽，風頭一時無兩，但小妮子談得最多的，卻是退役尾班馬「影子」，「跑得唔好只係太緊張，其實佢好有靈性」。跑第尾都錫到燶，做Vicky的知己，真幸福！記者：呂麗嬋
「我鍾意啲馬眼大大，最好眼珠大粒少少，感覺上比較忠心！」說起心目中的白馬王子，Vicky甜絲絲的說。全港共有174個女馬主，40歲的Vicky是其中之一。來自馬癡世家的她，舉家養馬，單她一個人，現役及養過的賽駒就有六匹。自細受爸爸影響出入馬場，別家大小姐怕曬又怕馬廐臭，她就一星期總有兩、三日，晨早七點，趁返工前的空檔，專程到上水雙魚河騎馬，順便探望她那些退役乖仔。
探望退役愛駒
說起乖仔們，她如數家珍：「周日出賽嘅知己性格最淡定，影子就最驚青，未出沙圈已周身汗，但佢好乖，之前季尾試過剩十分八分，再輸就要退疫，出賽前我細細聲同佢講，話呢場係告別賽，盡力就好，點知一出閘竟然領先，仲贏埋，唔使退役住，我覺得佢好有靈性」。
不少人說狗是人類的朋友，Vicky就視馬匹如家庭成員，即使所養的賽駒退役，也會送給騎術學校或付費運往海外頤養天年，就如跑得差卻仍甚得她愛錫的「影子」，現時就在雙魚河定居，每次騎馬，都會順道探望。
本周日，她的愛駒「魅力知己」就首次出戰打吡大賽，這項賽事有140年歷史，總獎金達1,600萬港元，屬全球最豐厚的中長途一級賽事之一，若贏出冠軍，Vicky更是首位贏得該項重要賽事的女馬主！千里馬創下奇蹟，但原來當初購下只因「一片好心」，「去紐西蘭拍賣會，臨離開前有位女士頭耷耷離開，佢話帶咗一匹馬嚟，但無人問津，願以底價約十萬港元出售，唔貴又可幫到人，那就買下了」。
優良血統的進口馬動輒三、四百萬元身價，這匹無人問律的賽駒，正是今日的冠軍馬「魅力知己」。上月十七日，熱鬥小馬就以九十九倍大冷門勝出香港經典盃，並贏得本周日在沙田馬場舉行的打吡大賽入場劵，一鳴天下響。