香港日本文化協會今年五十大壽，有一連串慶祝紀念活動，首先出版咗一本五十周年特刊，由饒宗頤先生題字，三月十一日在會展有午餐演講會，請來一位九十歲嘅日本茶道Great Grand Master（大師）千玄室演講：「茶道精神：一碗茶裏的和平安靜」，因用日語演講，英文即場翻譯似乎未能得其精髓，左丁山聽英文有啲聽到如入五里霧中，他日有機會再講。
香港日本文化協會會長係其士集團周亦卿博士，主席係趙達榮，新亞書院經濟系大師兄，佢在1961年畢業，距今五十二年，畢業後考到日本文部省（教育部）獎學金到日本留學，入咗早稻田，因講日文純正，NHK電視台搵過佢做廣播，不過後來有人介紹佢俾黃子明（通城錶行創辦人，精工錶香港總代理），於是回港加入鐘錶業，與精工錶打關係，從此與日本文化商業結上不解緣，參加香港日本文化協會活動超過四十年。八年前肥仔Ｋ步其後塵得文部省獎學金入早稻田（Waseda），去東京前趙老兄親自指點過佢。此日午餐演講會，趙兄滿場跑，招待賓客，左丁山唔敢打擾佢，打過招呼便算，點知席中有一位滿面英氣之青年，請教佢姓甚名誰，竟是趙達榮公子趙傑文，2011年香港十大傑出青年之一，果然虎父無犬子。
左丁山同席還有兩位中大前輩Ｗ及退休Ｋ教授，前輩Ｗ與一位年青女士密密斟，唔知係唔係密友，前輩Ｗ一眼睇穿，對左丁山講：「唔好諗歪咗，呢個係我嘅女呀！」Ｋ教授哦一聲：「我地一齊住在中大第三苑時，你位千金未曾出世噃？」前輩Ｗ大笑：「依家佢有兩個女嘞。」一有孫女，就離不開搵幼稚園，Ｗ千金係港大法律系畢業，現任職巨型跨國律師行做律師，絕對係眉精眼企能幹到極嘅精明女性，佢話：「有咗女就要想盡辦法搵學校，兩歲女考聖心就要揸住個咪作自我介紹㗎嘞，我帶個女去另外一間考K1，前後面試五次，連我都面試埋，我直情辛苦到極！」讀書啫，駛唔駛咁緊張呀，前輩Ｗ話：「我做阿公，退咗休，最得閒，專門免費揸車周圍攞form遞form為孫女撲學校！」Ｋ教授聽了，有感而發：「40年前我與勞思光一齊送女到女拔萃考小一入學試，考中英數，我地在外面等咗一個半小時，佢地出嚟之時，勞思光緊緊抱住佢個女，覺得個女太辛苦咯。去年勞思光逝世追悼會，我見到勞千金雙手捧住爸爸張相，我不禁流下眼淚。」