行行出狀元，界界有女神。咪以為官場內省鏡嘅人唔多，話說財經事務及庫務局常秘謝曼怡，最近憑住佢獨有嘅斯文氣質，俘虜新民黨一位年輕宅男芳心，仲將曼怡BB嘅玉照，存入手機留念。社運界周澄、主播界陳嘉欣同社福界碧樺依，又多一個同路人嘞！
葉劉宅男助手藏玉照
事緣新民黨主席葉劉淑儀日前率領一班年輕助手，同財庫局中人開會傾預算案，大爆其中一位年輕宅男，被外形純過蒸餾水、夠晒「那些年」鄰家女孩feel嘅謝曼怡迷倒，會後將佢嘅玉照存到手機，部份更配上心形背景，引述對方更考慮將謝曼怡嘅卡片過膠，難怪葉劉都封佢為「曼怡BB」，為官場熟女增光。
謝曼怡嬌小玲瓏，查實佢都係官場實力派，昔日喺財務科時已表現出眾，幾個月前更「突襲」令特惠生果金喺財委會戲劇性通過，咁叻，所以深受前特首煲呔器重，今年過埋生日就50歲，各方面都真係keep得幾好。
葉劉話曼怡BB84年喺港大畢業，同年做政務官，2011年獲任為D8級嘅財經局常秘，晉升速度相當快，真係美貌與智慧並重，佢仲話此事證明宅男女神唔一定係身材玲瓏浮凸嘅𡃁模，才貌雙全嘅女士都好有市場。
查實曼怡BB已為人妻，同發展局常秘周達明係政界廣為人知嘅夫妻檔；去年底佢哋嘅深水灣豪宅仲俾人爆竊，好彩曼怡BB無受傷，否則隨時心痛死班宅男。
mailto:[email protected]