周星馳只導不演嘅電影《西遊．降魔篇》，截至前日喺內地票房已經收咗12.22億人民幣，同最賣座華語片《人再囧途之泰囧》保持嘅12.63億票房只差4,100萬左右，破紀錄只係時間問題，而香港票房截至前日都有2,831萬港元。
票房好星爺心情自然靚，前晚約7點戴住cap帽嘅星爺坐住七人車到銅鑼灣嘅意大利餐廳食飯，坐咗冇耐就有兩位男性朋友嚟會合。星爺開咗支靚紅酒喺度嘆，不時聞吓又飲吓，動作多多手舞足蹈，仲興奮到攞起枱上嘅刀嚟玩。餐飯食咗兩個幾鐘至散場，星爺完全唔理記者提問就一支箭衝上七人車。
自稱九把刀粉絲
另外，星爺早排去台灣宣傳《西遊》，講到套戲將打破《泰囧》紀錄，佢話：「還沒有超過，對沒有發生的事情，我們先不要說。」講到佢嘅粉絲九把刀套《那些年，我們一起追的女孩》破咗佢嘅香港賣座紀錄，星爺好大方話：「我也是他的粉絲。」
撰文：馮仁昭
想睇更多首輪猛片介紹同預告片？《一台戲》為你網羅最新電影介紹及影評↓↓↓↓
http://hk.movies.nextmedia.com/