港台施永遠事件正迅速鬧大，𠵱家唔單止工會嘈，連已離職前高層如張國良、吳錫輝也公開發炮，今次睇鄧忍光處長點樣接招。施永遠同吳志森唔同，當日戴健民一眾電台高層獻上吳志森頭顱，將他從phone in節目叮走，討好鄧忍光，走上了錯誤一步。在港台員工眼中，吳志森唔係自己人，可隨時犧牲，但施永遠係港台自己人，亦屬港台主流派，你鄧忍光夠膽郁佢，擺明大家下一步就攤牌。
鄧忍光究竟因乜事呢個時候要攤牌呢？首先政治形勢有變，振英上台至今民望低殘，梁粉異口同聲認為傳媒集體唱衰佢，連張曉明都被滾，跟從梁粉口徑，公開表示民情與輿情有落差。要搞民意工程，港台自然要作喉舌平台。以往老董年代，但凡董特首民望低，老左就有爛頭卒出來表態抨擊港台，𠵱家中聯辦直接落場，利用外圍激進梁粉組織去鬥港台，淨心BB就係小闖將。
矛頭一直指向《議事論事》及《頭條新聞》，上次發生淨心BB「關你嘟事」後，老左亦乘機發炮轟港台。本來鄧忍光要將《議事論事》摺埋，一了百了，冇眼屎乾淨盲，唔使背後俾邵善波、張志剛、陳茂波等振英核心內閣成員日插夜插。但港台呢次學精咗，尤其電視部比電台班人硬淨得多，一於唔肯就範。但佢哋亦有應酬鄧忍光，效法CCTVB《講清講楚》，開個官員公關宣傳節目《星期五主場》，一人行一步。哈，人算不如天算，第一集重頭嘉賓是行事仲低調過黃仁龍嘅律政司袁國強，根本就冇政治表述能力，俾𡃁仔主持窒到口啞，辳爆收場。呢筆賬梁粉閣員又計在鄧忍光頭上，鄧自然要拿施永遠去祭旗。
疑有任務在身 冇信任可言
以往但凡老左或政府內部，如煲呔對港台窒頭窒勢好不滿，去到三司層面，唐唐通常會撐住，而上手AO處長傅小慧也識做，閂埋門會同港台高層講清楚政府諗法，但對外則一致，慢慢一年後大家建立咗互信。有時上頭發落嚟嘅任務，AO稱之為「落單」，處長收到單，知悉有ABC三項工作之後，自己應先作評估，究竟是否可行，並衡量付幾大代價，如果冇得做，通常就會「吞單」，即係做A、B，吞下C部份唔做，或者擺明車馬回覆上邊「搞唔掂」。傅小慧聰明之處係當「收單」後，秤過度過，發覺點都要做A、B才能交單時，佢會engage港台高層一齊度橋應付，一早buy in咗港台管理層，大家就唔使估，猜疑對方是否有不可告人政治任務。
鄧忍光大鑊之處，係大家冇信任，令人覺得佢有hidden agenda，借小事發難去修理唔聽話員工。而環顧今日梁粉內閣及三司高層，又有邊個夠guts企出嚟為鄧忍光擋住無理政治要求呢？上下夾攻，佢自然會失方寸。
身為AO，如果只懂不理代價將上頭落單執行到底，基本上只能算EO水平，更講唔上做AO精英！
添馬男