香港人由細食到大嘅日清杯麵，竟然俾康師傅（322）打敗！根據調查機構Euromonitor最新數字，截至舊年底，康師傅喺亞洲區嘅市場佔有率達13.6%，第一次打贏只得12.3%嘅日清，成為即食麵亞洲霸主，統一（220）就排第四，強國產嘅白象排第五，只有3.4%。
其實呢場清仔大戰Master Kong嘅戰爭，已經打咗五年。08年開始，台灣出身嘅康師傅，一直蠶食日本主導嘅即食麵市場，由10.1%一路搶到13.6%，舊年終於成為冧巴溫。
可能大家會問，康師傅有乜咁把炮，可以打贏港人至愛嘅日清呢？其實咪又係靠強國囉，日清年報顯示，2011年喺中國區銷售約17.7億港紙，康師傅就有成23億，以每個杯麵8蚊計，足足賣多6,000萬碗！強國人寧願捧台灣品牌，唔通又係反日？