上期晉佳估洗倉潮唔會維持好耐，結果噚日先反彈一仗。不過，港股連玩三日震倉，噚日先跌後嚟個大報復式反彈，短短四個交易日大市情緒完全變晒，呢種市況好容易令投資者失去冷靜，所以偏要更冷靜！
恒指2月下旬至今造咗個擴散三角形，證明市況膠着得嚟波幅不斷擴大，反映投資者情緒越嚟越唔穩定，同目前形勢相當貼題。傳統嚟講，擴散三角形後一旦出現方向，唔係大生就大死，仲要大死居多，所以現時大市仍未脫險，短期內最好回復平靜，否則唔多妥。不過，安東油田（3337）、華能新能源（958）、金地商置（535）噚日急衝，晉佳覺得唔係健康現象，因為快彈睇怕就會快散，要散就仲可怕過啱啱呢轉。
三板塊避之則吉
兩個字：難搞！投資者呢刻唔點揸貨繼續避戰，其實冇話錯，但就要決心唔理波幅，切忌忍唔住手追貨。進取參戰嘅話，就要先做好防守再諗進攻，務求喺個市可能回復穩步上揚嘅情況下，可以搵到着數，同時又有機會避過可能出現嘅洗倉潮，所以就要先諗如何避過地雷，然後先諗點樣搵着數。
今日先提供地雷股畀大家趨吉避凶。地雷股之一：成交活躍熱門股。𠵱家市場上出現唔同嘅賭局，唔係濠賭股而係一批快上快落、左右買賣盤活躍嘅熱門股，呢類股引嚟一大批投資者參與，只要儲齊一批散戶就有機會震倉，上述安東油田、金地商置睇怕都係呢類股份。
地雷股之二：國策受災及受惠股。國策受災股唔應該買就唔使多講，至於國策受惠股又點解？原因係前排好炒嘅國策概念，例如新能源、環保、嬰孩產品股，唔少股份基本因素未必理想，所謂受惠國策好可能係十劃未有一撇，揸呢一批股，風險亦比較高。
地雷股之三：本地資產股。日圓量寬、美元走強，港元資產開始冇咁有吸引力，買股口味隨時寧願冇磚頭好過有磚頭，所以揸重磚頭嘅股，最好避埋佢。
晉佳
本欄逢周一、三及五刊出